劉德華喺紅館開嘅十五場演唱會，將邀請下周一嚟港嘅中國奧運選手，抽空去睇佢嘅個唱，現時知道發咗邀請嘅奧運金牌選手有成五十幾人，不過華仔個唱又一早已爆滿，所以𠵱家佢好忙咁四圍撲飛。
原來之前華仔喺綵排期間，香港兩位乒乓球手李靜同高禮澤已經話想捧華仔場，於是華仔就送咗飛畀佢哋，後來田亮同胡佳又話想睇，華仔諗住既然係咁，不如請埋其他選手一齊嚟睇，但佢就唔知有五十幾人咁多。不過𠵱家有關方面就未覆實有幾多人同邊日會去捧華仔場，但聽聞反應都幾踴躍，最大機會係下個禮拜三。
據知紅館裏面貴賓席只係得十幾個，獲邀嘅奧運選手就算只得一半人去都唔夠位坐，所以華仔呢兩日已經發散晒全公司上下員工去𢱑飛，佢自己亦狂打電話畀買咗飛嘅朋友，希望有人肯先讓啲飛出嚟，而到噚日為止，華仔自己就刮到八張飛。
此外，華仔前晚舉行第二場個唱，余安安、朱玲玲、王小鳳等都有捧場，華仔企上高台表演時話：「我噚晚返到屋企，我老竇叫我企喺高台度唔好搖，我話我唔可以只係企定定唱歌。」
由官恩娜（Ella）、周俊偉同曾國祥主演嘅新片《地老天荒》，噚日喺屯門龍鼓灘開鏡。Ella同周俊偉喺戲中飾演一對未婚夫婦，但係佢哋結婚之前，Ella因為車禍死咗。Ella噚日話喺農曆七月鬼節拍死人戲諗起都有啲驚，佢重即刻問公司攞利是討番個好意頭，但拜神嘅時候，Ella唔小心跌咗啲元寶落地，佢重多口話：「跌晒啲錢落地㖭！」身邊嘅工作人員即刻叫佢唔好亂講嘢。
Shine噚日喺尖沙嘴擔任一間男裝店舖嘅嘉賓，佢哋本月中會推出離開EMI唱片公司前嘅最後一張唱片，問Shine會唔會擔心公司縮減宣傳費時，佢哋起初支吾以對，指一向都唔理公司用幾多宣傳費，其後佢哋嘅經理人透露，原來已同另一間唱片公司傾得七七八八，不過暫時未可以透露，唔怪得佢兩個講嘢咁官腔啦，原來已經有後着。
吳君如早排去墨爾本為有線做旅遊節目，佢重去咗賭場碰吓運氣。君如同成班工作人員，見到有一張寫住21點嘅枱冇人坐，就成班人包起咗張枱，但係佢哋就唔係咁好運，因為荷官頻頻開21點，之後君如又走去玩百家樂，但佢又唔知點樣為之輸同贏，卒之君如輸咗幾千蚊，不過佢話玩得開心，輸錢都冇所謂喎。
關心妍噚日去青衣城出席活動時，提到同公司嘅傅珮嘉被雪藏，佢話唔清楚，但唔知關心妍係咪好驚被雪，所以強調自己一直都好努力工作，係一個聽話嘅乖學生，所以公司應該唔會雪佢，而呢段敏感時刻，佢唔會打電話畀傅珮嘉住。至於有報道話傅珮嘉同Boy'Z嘅Steven轉玩地下情，關心妍亦即刻話唔清楚，自己亦從來唔會問人哋私事喎。
