特區兵荒馬亂，突有異軍殺出，潛咗水好耐嘅財政司前司長梁錦松，突然受到中央電視台祝福，愛妻小伏接受中央台專訪，除咗向全國人民滙報甜蜜生活，專訪旁白重點名講起阿松！
同時，赤松亦轉趨活躍，即將出席論壇綜論經濟局勢，同時，李國寶亦失驚無神話，阿松可以做特首！
嘩，今次峯迴路轉，莫非天意？呢兩日，大環山同斧山道泳池，紛紛出現紅蟲驚兆，食環署提交報告，聲稱喺大環山嬉水池發現蚊屍，不過康文署就否認，話並冇活嘅蟲蛹，啲紅蟲唔係喺佢管轄範圍內滋生！
咁三隻蚊屍去咗邊？竟然要出動重案組深入調查。堂堂重案幹探，要調去搵三隻蚊嘅蚊屍，呢個政府係咪黐咗線？
大班遭到恐嚇，都未出到重案組，搵蚊屍就咁識得調配資源，唔怪得赤松做財政司司長嗰陣，堅持大力削減公務員薪酬！
赤蟲復現水池，實為天意，預示香港一個新時代即將來臨。諗諗吓又係，現時特首人選，冇幾多個揀，唐唐、英哥、當奴，加埋阿正，個個都有先天不足或者後天嘅牙齒印。北京權力鬥爭激烈，胡溫曾江唔知開邊瓣，「候選人」搭線天庭，隨時會搭錯插蘇燒「灰屎」，喺呢個時候，雪藏咗咁耐嘅赤松，重新解凍，畀佢出嚟跑兩個沙圈，睇吓毛色收成點，睇怕都冇壞。
赤松有翻生之日，呢一樣由銀紙已見徵兆。阿松辭職之後，不但佢當年簽發嘅十蚊紙幣一張都冇回收，重加印發行，啲十蚊硬幣就收番晒，證明國家對阿松，係暫時收容教養。難得阿松卸任期間，重精力旺盛，搞多個女出嚟，生存意志咁堅強，可見係領袖人選。喺呢方面，去巴黎開房留低對靚鞋嘅寶哥哥，難怪識英雄重英雄！
所以就算水池發現赤蟲，此時此刻，邊個敢去捉？捉蟲即是違抗天意，何況啲蟲係紅色嘅㖭。古語都有話：「赤蟲出而天下足」。今次天降吉兆，香港有運行咯，各方精英，好買定花籃排隊送畀松嫂賀佢再添個BB呀。
傳真︰2623-9278
電郵︰