PTT服務9月尾有得玩<br>手機變對講機一按即傾

PTT服務9月尾有得玩
手機變對講機一按即傾

無線電對講機（WalkieTalkie）乃近年大熱之產物，無論係行山友定係車主，都會買番部隨時同朋友邊走邊講。不過，另一新浪潮已經殺到埋嚟，就係手機的PTT（PushtoTalk）功能，將手機變成WalkieTalkie，㩒個掣就即時講。而日前新世界傳動網就率先讓傳媒試玩，你都好想玩？唔使急，呢個月尾大家都有得玩！

記者、攝影：劉耀祥
ImageGirl：Cody

顧名思義，PTT（PushtoTalk）就係「一按即講」，淨係睇呢四個字就以為同WalkieTalkie一樣咁玩，不過只係啱咗一半，背後系統絕對係「各有各做」，完全係兩種唔同嘅操作模式。首先傳統嘅無線電對講機，只要調校至相同頻道，就可以不限人數咁「你一言、我一語」，不過現時市面上發售的Walkie都有距離限制，最遠亦只係得幾公里。
而PTT則利用現時手機上的GPRS或EDGE制式，將訊息作即時傳送，換句話講，只要有網絡覆蓋地方就可以玩到，完全不受距離限制，若果配上GPRS漫遊，去到外國都一樣傾得，就等如傾長途電話一樣。

■傳統Walkie雖然操作較方便，不過距離及頻道有所限制。

■Nokia5140

新世界率先推出
想玩PTT，首先須要手機內設有PTT功能，以及手機網絡商的支援。現時市面上只有Nokia的5140支援此功能，各大網絡商都未有支援PTT服務。而新世界傳動網早於6月時就已經向Nokia簽訂價值3000萬美金合約，將現時系統加入PTT服務及EDGE制式。所以日前新世界傳動網就率先宣布推出PTT服務，並供香港各大傳媒試玩。雖然新世界傳動網之PTT服務要喺九月中或九月底先正式推出，收費暫時未定，但預計會以月費形式收費。

■開機時會自動搜查網絡，並開啟對講機功能。

實地測試
話就話現時只得Nokia5140支援PTT服務，之但係其實Nokia7610及6600等SymbianOS手機，只要裝上PTT程式，都一樣可以玩，不過就要待PTT服務正式推出時，新世界傳動網方面先會正式提供安裝。由於PTT服務仍屬測試階段，所以測試集中於油、尖、旺等「旺區」。只要先設定好有關資料，就可以馬上「一按即講」。
實際測試中，不論兩部5140相隔多遠，都一樣清楚聽到對方說話，而且「穿牆過壁」能力亦十分好，兩部手機各處不同地區之大廈內，亦可以收到。不過通話時有2-3秒延遲情況出現，相信由於訊息需經由網絡傳送，所以出現延遲情況，此乃與傳統Walkie不同之處。