華姐鍾嘉欣加入處境喜劇《皆大歡喜》短短數月，已不斷傳出緋聞，但她仍處之泰然，更直言對緋聞男友劉愷威和鄧兆尊毫無感覺。但當提到將在劇中飾演其男友的馬浚偉時，她卻大讚對方外形符合自己要求，莫非馬仔才是她的真命天子？
華裔小姐冠軍鍾嘉欣（Linda）加入《皆大歡喜》四個多月，演技不斷進步，能夠被觀眾認同，令Linda開心不已，她日前接受訪問時說：「行街時聽到有人叫我洪白嵐，都好開心㗎！我就覺得喺四個幾月裏面，演技真係進步咗，之前演得好硬，但𠵱家就放咗、大膽咗好多。」
除了演技，最令人注意的莫過於Linda的緋聞，雖然入行短短半年，但她分別與《皆》劇演員劉愷威和鄧兆尊傳出緋聞，對此她大呼冤枉說：「兩次都好無辜呀，呢啲都係作嘅，但係我唔會開心又唔會唔開心，覺得有少少好笑。愷威同兆尊就好似我哥哥咁，我對佢哋完全冇嗰種感覺。」
而馬浚偉即將加入《皆》劇，他與Linda在劇中有一段感情線，加上馬仔的外形，正好就是Linda心目中的白馬王子，難怪Linda已做足心理準備跟他傳緋聞，她笑說：「就嚟㗎啦！」
問Linda馬仔這類型男士是否她心目中的理想對象時，她說：「外形都OK㗎，但我都唔認識佢，都唔知佢個人係點。我鍾意嘅男仔係要好細心，我唔講已經知道我諗啲乜，重要家庭觀念重同錫我，因為我鍾意俾人照顧多過照顧人。」早前馬仔大讚Linda又乖又靚女，未知今次合作能否擦出愛火花呢？
採訪：羅慧敏 攝影：林德雄 服裝提供：LaneCrawford
