經紀黃推介的蒙牛乳業（2319）業績靚爆鏡，令股價走勢由乳牛變成蠻牛，噚日表現極佳，大升7.84%，以全日最高位5.50元收市，剛好升回上市以來最高位，成交金額高達1.26億元。
經紀黃話，由於蒙牛嘅佳績係意料之外，所以大部份外資證券行急急調升盈利預測及目標價，芬佬跟隨分析員報告買賣，直情係追貨追到氣咳。
另一隻同樣在前日公布中期盈利勁升的大成生化（809），就唔似蒙牛咁有爆炸力，噚日股價只係微升2.66%，收5.80元，成交金額4329萬元。
大成截至今年6月止中期業績，盈利4.21億元，比舊年同期增長84%，兼派中期股息2.5仙。
小初唔明大成業績咁靚仔，但點解股價咁牛皮？經紀黃話，因為大成的主力產品賴氨酸價格近期回落得好急，但咁唔等於芬佬離棄大成，雖然產品價格回落，但芬佬相信佢會增產應付，以量取勝，同埋新廠投入生產會帶來貢獻，所以繼續睇好大成。
慕容小初