馬會派發○三?○四年度年報，封面大標題係Standingstillisnotanoption，中文譯作「尋求突破，永不停步」，聽電台錄音，馬會主席夏佳理好似係講：「唔可以坐響度唔做嘢。」夏主席啲廣東話好似有骨噃，大公司開董事會或高層會議之時，大老闆講一句：「唔可以企喺度（或坐響度）唔做嘢」，你如果係公司高層，聽咗怕且會心裏為之一震呀嗎？
馬會要做嘢，挽回投注額不斷下降嘅趨勢，第一招係「即時放寬申請投注戶口需要香港身份證限制，訪港旅客只要有香港銀行戶口便可申請」；第二招係：「新馬季開始，馬場特設人民幣找換服務櫃位，方便自由行旅客。」以上兩招，其實都係吼住自由行內地客。內地客來港開設銀行戶口，跟住開埋電話投注戶口，算唔算資金外逃呢？中國有外匯管制條例嘅噃，會唔會分幾次來港，每次帶合法外匯限額，存晒落電話投注戶口，以備後用呀？以前馬會游說政府訂定條例，唔准香港居民打電話去外國投注賽馬或足球，估唔到現在就方便外國人打電話嚟香港下注，其中有冇矛盾呢？
許冠傑唱歌：「為兩餐乜都肯制，前世！」都係無謂再講。退休人士老李就話呢兩招唔得，因為自由行旅客拎晒啲錢去澳門貢獻晒畀燊哥與金沙。老李上星期去澳門食水蟹粥，夜晚去金沙，只見人山人海，全部係內地同胞，逼唔到埋去賭枱，到有機會之時，原來賭大細要每注三百蚊，老李當堂縮沙，因為退休後唔敢亂咁賭也，於是走過隔籬文華東方酒店賭場，居然搵多個人都冇，張張賭枱都係櫈多過人，荷官對老李無限歡迎，教埋佢呢鋪買大，嗰鋪買細，居然貼士甚準，贏咗五百蚊，老李立即鬆人。老李話睇吓澳門就知道內地同胞一擲千金，賭大細唔使學，賭馬就複雜好多，佢哋邊會轉過嚟賭馬吖！