一年一度嘅京港經濟合作研討會，噚日喺灣仔會議展覽中心舉行，挾北京奧運會嘅威勢，北京市代表帶咗唔少項目嚟香港招商，一班大孖沙當然要畀面出席開幕禮，四大富豪兼北京名譽市民：李兆基、鄭裕彤、李嘉誠同何鴻燊同場出現，重有一位招商會稀客到場，佢就係八方睇親奧運女子體操運動員做拱橋，都會諗起嘅彭丹。
彭丹一出，在場傳媒哄動，除咗因佢毫不吝嗇咁展示驕人身材，重有係，有人介紹佢同北京市副市長兼北京奧組委常務副主席劉敬民認識，彭丹未及自我介紹，劉副主席已經話，「我有看過你的電影」，話口未完，重遞上名片。彭丹乘勢要攞劉副主席嘅手提電話號碼，劉副主席當然冇托手踭。
八方問彭丹，招商活動都嚟？彭丹話，佢主演嘅電影《張思德》今個星期日喺人民大會堂首映，劉敬民出席做嘉賓，所以趁機會同佢見過面先；佢重話之前已認識劉副主席，大家重食過飯㖭。咁點解食飯時唔攞手電號碼，等眾目睽睽先攞呢？ 程志遠攝
（圖）彭丹：給我電話號碼啦！ 劉敬民：當然可以。
傳真︰2623-9278
電郵︰