艾列頓喺轉會史浩克04後頭頭碰着黑，重未喺德甲聯開齋之餘，重因打對手同冇依時出席藥檢而被罰停賽四場。佢想成功衞冕德甲聯神射手寶座，睇嚟都幾難囉。
上屆幫雲達不來梅贏咗德甲聯兼自己攞咗射手獎嘅艾列頓，今屆喺史浩克嘅發展認真麻麻。呢位巴西球員踢咗三場聯賽都未開齋，喺上周六對羅斯托克蓄意侵犯對手被逐，兼賽後冇依時出席藥檢（好彩事後即刻返球場做番）。德國足總就覺得佢冇紀律，於是罰佢萬五蚊歐元（約十四萬港元）同坐四場波監。
史浩克話明唔上訴，咁即係艾列頓頭七場聯賽都冇波入，所以佢想連續第二年攞神射手，睇怕都幾難。但史浩克重慘，佢哋諗住可以同拜仁、不來梅同利華古遜爭聯賽錦標，睇怕都係得個桔；就算佢哋冠軍賠率有成十七倍，好似幾好分，我求大俠都係勸大家咪買。
朗尼轉投曼聯，愛華頓fans當然失望；有位球迷更喺前晚朗尼落實轉會後，第一時間將佢擁有嘅網址
皇家馬德里前晚友賽墨西哥球會佩馬斯輸一球，奧雲就首次正選上陣。自從上賽助攻畀朗拿度建功後，唔少皇馬球迷改變對奧雲睇法：話魯爾成八個月冇喺主場入波，𠵱家又受傷，係時候坐吓後備席，畀奧雲踢正選。我求大俠都覺得，皇馬咁多星，奧雲冇咁大壓力，應該有作為！
拉素上個月喺意大利超級盃大敗後，迪肯尼奧、古圖都促請會方買人。唔知會方係咪聽到呢兩個老鬼嘅訴求，喺轉會市場關閉前一口氣簽入九個球員。當中只有菲臘賓尼兄弟、洛基叫做有啲名氣，對提升球隊戰力未必有大幫助，有啲拉雜成軍感覺，只怕佢哋季初得個「亂」字。
巴西球星卡卡球技好又夠「帥」，自從舊年暑假來投後，AC米蘭一直當佢係寶。正所謂愛屋及烏，早就有消息話AC甚至想打佢細佬迪加奧主意，果然早兩日付諸實行，簽佢入青年隊，先跟青年隊教練巴里斯學法。話唔定響不久將來，大家可以睇到卡卡兄弟並肩為AC作戰。