理大噚日開學，校內民主牆上就即刻有嘢睇，有人貼咗張大字報聲討校董會主席羅仲榮。事緣羅仲榮任主席兼總裁嘅金山工業集團，旗下喺內地嘅電池廠於七月初被指罔顧員工安全，令唔少員工中鎘毒，危害佢哋嘅生命。
大字報要求羅仲榮成立一個五百萬元賠償基金，並加強對員工嘅安全措施，喺十四日內作出回應，否則會有進一步行動。金山發言人就話已經幫啲員工檢查身體、加強保護同有類似嘅賠償基金。張大字報傍晚畀校方人員撕去，理大發言人話，查過大字報上嘅學生編號，發現冇呢個人，違反貼大字報規定。
不過，八方噚日有接觸過嗰個學生，佢話好不滿羅仲榮嘅公司咁對待員工，所以想幫佢哋出頭，但又擔心遭到報復，所以唔想公開身份。佢話，如果羅仲榮冇回應，就會到校董會抗議同埋發起罷買金山出嘅GP電池。
（圖）有理大學生喺民主牆上貼出大字報，要羅仲榮回應其公司喺內地嘅電池廠有員工中毒事件。
傳真︰2623-9278
電郵︰