中國在雅典奧運勇奪三十二面金牌，大部份係在射擊、跳水、乒乓、舉重方面奪得。左丁山認為最難嘅有兩塊，其一係女子排球，先落後兩局，後連贏三局反勝俄羅斯；其次係一百一十米跨欄，劉翔以平世界紀錄時間得金牌，睇佢跑得好似幾輕鬆，用賽馬術語就係潛質未盡，仍可進步。到咗二○○八年，劉翔會係大熱門。呢個項目素來係黑人天下，一百年來未有亞洲人贏過，劉翔破天荒，非同小可也。不過既然露咗光，美國黑人運動員必然以佢為競爭對象，有排爭。
劉翔贏咗之後，對記者話佢最鍾意舒淇，肌膚雪白，令佢逢係見到舒淇海報，都駐足而觀。既然係咁，佢嚟到香港之後，何志平局長夫人胡慧中大可以急call師妹（大家同樣來自台灣）舒淇，安排佢兩個企埋影張全身相，等劉翔拎返上海，日睇夜睇，增強佢四年後衞冕嘅動力。
劉翔跨欄時，踢起一對紅金黃色嘅輕巧Nike跑鞋，事後話係特別設計嘅，鞋後面印咗劉翔個名。呢次Nike發達咯，搵劉翔賣廣告，主攻中國市場，銷路一定大增，以前Nike贊助MichaelJordan球鞋，據稱為Nike帶來二十六億美元嘅銷售量，你估劉翔可以在中國幫Nike賣幾多對鞋呢？
不過有人話劉翔身價可以媲美姚明，未免過份樂觀。姚明打NBA，電視轉播次數頻密，曝光率極高，而田徑賽就久唔久舉行一次，即使世界田徑賽、歐洲田徑賽、亞運有百一跨欄賽事，電視播映似有若無，劉翔嘅知名度一定追唔上姚明，佢嘅廣告價值自然低好多，以前美國田徑巨星劉易斯嘅廣告收入就拍馬追唔上佐敦啦。