個市升起上嚟，㩒都㩒唔住，恒指輕易飛越萬三點。恒指𠵱家13023，較去年年底升448點或3.6%。滙控（005）𠵱家122.50元，同去年底完全一樣，乜滙控今年盤數咁正，都仍然跑輸大市？滙控唔係應該跑贏大市嘅咩？用相對走勢分析，滙控落後，即係有上升空間。
滙控C輪：昨日推介滙控C輪9876，升14%。今日推介另1隻滙控C輪2155，賭法唔同，一樣有機會賺到笑。2155明年4月到期，壽命夠晒長，輪價1.09元，溢價只係0.3%，槓桿率11.2倍（有效8.1倍），引伸波幅17%。隻輪槓桿率低過好多短期輪，爆炸力自然相對低啲。譬如用10萬元賭短期輪，按正股變化假設可以賺（蝕）1萬元，但同樣用10萬元賭隻2155，因為槓桿效應細啲，只會賺（蝕）5000元，表面上，蝕底1半。不過如果肯攞多10萬元賭2155，總本金20萬元，則賺（蝕）就擴大到1萬元。咁樣做嘅好處，係買多啲時間。揸短期輪，一兩個月夠鐘，而揸2155，則「甩牌」「甩」到明年4月，多四五個月賭。話唔埋呢四五個月，正正係滙控狂升時期。
滙控今年高位129元，睇嚟好快再見，2155見1.70元。明年4月前，滙控見145元非無可能，2155值3.3元，即有機會6-7個月內博賺2倍。
電盈C輪：股市急升，電盈（008）係少有原地踏步嘅成份股，收5.20元，遲早炒落後，收集定啲C輪，對象係9814，明年1月中到期，輪價65仙，溢價8.4%，槓桿率8倍（有效5倍），引伸波幅42%。各輪數據，最靚係佢。
章盛