西灣河嘉亨灣係八月矚目大盤，銷情推動樓市升溫，今個月焦點轉移，其中深井開始逐步聚焦，皆因碧堤半島二期殺到，各代理行忙於部署吸客。
美聯噚日率先誓師，九倉黃光耀梗係到場打氣，睇吓張相，就知場面有幾墟冚，呢啲場面陸續有來。
美聯布少明話，自從發展商接受收票，美記收到唔少客洽購，其中一個台籍客，傾緊三層第二或三座中層以上二十四伙，涉資逾億。
碧堤二期來勢洶洶，同期登場新盤，好似香港興業東涌藍天海岸，同長實悅濤軒，都齊齊密集宣傳，未開賣前，先喺宣傳上一較高下。
永泰與南豐，近年起樓唔多，但每項都精雕細琢，宣傳落足心機，創意無限。好似佢哋合作嘅沙田晉名峰，就用咗懂得享受生活，又有實力嘅「大亨」概念去軟銷，重話個盤優點太多，會慢慢公布。
噚日首度公布其中一座住宅資料，席上兩公司負責員工，向傳媒派發名片，幾特別，上面印有晉名峰標誌外，重有由專業攝影師拍攝嘅人像相片，單睇包裝，就知發展商對個盤幾咁重視。
奧運剛閉幕，運動熱潮喺內地未降溫，因為九八年奧運會喺北京舉行。
泛海國際同深圳漁陽合作嘅深圳東悅名軒，商場部份命名深圳奧運城，四層共十五萬呎，有百二個舖。
泛海執行董事關堡林噚日同商戶簽租約，原來唔少都大有來頭，例如Nike、Adidas同埋本港上市嘅李寧等品牌。
關堡林話，商場租出逾九成，若全數租出，料年收二千幾萬。至於上面嘅住宅，舊年已經全部賣晒。
大手成交頻傳，業主放售物業一啲都唔急。中原唐寶華話，原定聽日截標嘅觀塘寶峰大廈商場，業主見初步反應好，所以延遲一周，即今個月十號至截標。批貨包括地下一至七號舖、閣樓、一樓及三樓A，總共逾萬呎，全部租出，月收逾三十三萬。商場大租客係火鍋店，佔逾八成樓面，租期至一○年。
蘭西記得，今年都有好幾件物業，曾將截標日期押後。
投資者黎汝遠，近嚟頻曝光，噚日出席港置分行開幕做嘉賓，自爆啱啱賣出九龍灣企業廣場二期四千六百幾呎，造價千四萬。半年賺三百幾萬，佢話OK啦。
至於二十四個西灣河嘉亨灣單位，已經賣出十四件，賺五百幾萬。
薄扶林貝沙灣一期，剩番兩件，好價就賣。貝沙灣獨立屋，同盈大勘緊兩間，未落實。市場更傳聞，四太梁安琪都有意預留獨立屋。
蘭西
電郵地址：
