馮仁昭四圍超:Edison周杰倫阿樂波場泯恩仇

馮仁昭四圍超:Edison周杰倫阿樂波場泯恩仇

周杰倫、陳冠希(Edison)、余文樂、房祖名同森美,前晚約埋一班工作人員去窩打老道YMCA青年會嘅六樓運動場打籃球,成班後生仔精力充沛,打足三粒幾鐘至曲終人散。
前晚十一點幾,成班男星已經打緊波,佢哋包晒成個運動場嚟比賽,大堂重有五個保安看守,直至約凌晨兩點,Edison攬住個籃球一馬當先落樓,重同記者揮完手先上車。冇幾耐森美同阿樂落樓,包尾離場嘅就係用毛巾包頭嘅周杰倫同房祖名。
周杰倫、阿樂同Edison因為拍攝《頭文字D》結片緣,早排有報道話Edison俾同片演員杯葛,如果真嘅話,前晚Edison就唔會同周杰倫佢哋打波啦!

「杯葛係小朋友嘢」
此外,阿樂前晚出席《903萬人迷大作戰》,年前佢同Edison發生撞膊事件,DJ少爺占問阿樂當日Edison喺佢耳邊講啲乜?佢話:「咁耐唔記得啦!」而阿樂對於Edison俾《頭》片演員杯葛嘅傳聞就話:「杯葛係小朋友嘢,大家係大人,唔會做呢啲嘢。」對於Edison話同佢唔係食飯嘅朋友,阿樂就話:「朋友唔一定要出街食飯。」

Isabella高空影相夠淡定
梁洛施(Isabella)嘅處女EP推出三星期以嚟成績唔錯,近日唱片公司重新印製推出第三版,無論喺封套同隨碟附送嘅禮物都同之前唔同,尤其係唱片封套相,Isabella着咗一條粉紅色嘅背心裙,坐喺三十呎高樓上擺甫士,連在場嘅工作人員都為佢抹一額汗,但Isabella就面不改容,我馮仁昭都好佩服佢。

王力宏背阿妹咀靚女
最新一期台灣《壹週刊》偷影到王力宏啱啱禮拜日趁住緋聞女友張惠妹嚟香港做嘢,同混血靚女約會嘅相,之後坐的士送個女仔返屋企,佢哋落車後喺街邊又攬又錫。王力宏噚日透過新力唱片公司,話個女仔叫Zoe,係佢好耐冇見嘅好朋友,佢兩個只係禮貌性goodbyekiss,希望件事唔好對女方造成困擾喎!

劉浩龍見翻版碟開心
劉浩龍噚日去九龍灣出席商台節目《K饉40》,佢話媽咪最近有個朋友喺內地買咗隻碟畀佢簽名,點知原來係翻版碟,佢梗係唔簽啦。劉浩龍話:「其實心情都幾矛盾,一來好開心,有翻版即係有市場,不過翻版始終都唔好,我重無端端做咗滾石歌手,同埋可以同歌神許冠傑同一隻碟囉!」

有線東森今進軍美洲
有線衛視新知台同東森電視合作,今日開始喺美洲同南美地區播放,為有線邁向國際化發展跨進重要嘅一步。有線節目部執行董事徐小明話好多香港藝人去美洲登台,佢哋喺香港嘅消息有助增加喺當地嘅知名度。
而任賢齊、朱茵、黃貫中同何超儀得知呢個消息都好開心,認為可以幫到佢哋開拓海外市場。

余文樂同周杰倫鬥完波後,滿頭大汗咁離開。
DV圖片

余文樂同周杰倫鬥完波後,滿頭大汗咁離開。
DV圖片

Isabella

張惠妹(左)、王力宏(右)

劉浩龍(中)

徐小明