今日上映的電影《六壯士》中，六種「男人最痛」令六個男人分別尋死。老實講，身邊正面對各種「男人最痛」的人，真係一個招牌跌落嚟壓死幾個。但就算心裏多難受，要向來「唔衰得」的男士們向人承認受挫，找人吐苦水，難度分直達9.99！今期訪問的全職粉友南哥、失業中年Sunny，還有精神病康復者大華，就用真人真事話你知，只要跌低後識得爬起身，個個都係壯士！
記者：陳慧敏
攝影：楊錦文、林栢鈞、周旭文
鳴謝：基督教新生協會、明愛基層組織發展計劃、香港中文大學情緒中心主管李誠教授
電影故事：
四位社會精英，面對前途、社會、感情問題打算集體跳樓。
連串的小插曲讓自殺者增加至六人，又讓他們認清生命該是怎麼一回事……
南哥今年53歲，與妻育有一子一女。十三、四歲開始吸毒，全職賣白粉，累積案底17個，偷呃拐騙樣樣齊，偷屋企錢都理所當然，40年來多次戒毒失敗，在家的活動範圍只有門口同睡房，一家大細無溝通，今年升讀中六的囡囡，記憶中只跟爸爸喝過兩次早茶。
兄弟面前唔衰得
浪子為何50歲先至想回頭做好爸爸？「其實二十幾歲時已知衰，但呢個圈嘅男人特別講面子，唔衰得，個個食你點可以唔食？而且自己都已經係堆爛泥，吸毒死咗咪算數囉。」兄弟面前當然豪氣又瀟灑，但真心嗰句係：「好驚俾人認出係道友，日頭人多嘅地方唔敢去，出國旅行冇諗過，最驚見到警察。屋企人又唔同我傾偈，老婆仔女都唔敢帶朋友返屋企，覺得好慚愧。」
牧師一言驚醒
一日，曾跟南哥一起坐監的陳牧師問南哥：「你呢世人究竟做過啲乜係見得人？」諗諗，真係冇。於是跟陳牧師去了福音戒毒：「初時好驚，怕被排擠。其實係自尊心重又自卑，唔敢搵人幫。但原來只要肯試，啲人就會接納你。」認識了一班互助互愛的教友，更發現自己依然做得嘢，幫得到人。
重新做人的南哥，現時是戒毒所的義工及基督教新生會的幹部，53歲，正式做其人生的「第一份工」，跟仔女關係親密了好多，經常一齊傾偈、睇碟、上網打機跟捉象棋。今年8月，囡囡第一次送禮物（運動衫）給南哥。要拍照，見他揪住「一個月內着咗好多次」的衣襬一角，問小記：「我笑得夠唔夠開心呀？」簡直幸福滿瀉啦！
「男人唔衰得㗎嘛！」「男人唔鍾意講自己嘢嘅！」這兩句話，訪問中Sunny三句唔埋就講一次。男人失業絕對忍受不了「等人養」三個字，這個「人」不但指女朋友或家人，還包括公共援助金。
無錢唔敢落街
33歲原職文員的Sunny，天生體弱，失業年半，由積極搵工到心灰意冷，還一度想過尋死。「初期一日見1、2份工，後尾2個禮拜至見1份工，更要將搵工範圍縮窄到屋企附近，慳番啲車錢。又怕包租婆追數，街都唔敢落。」
日日即食麵
硬頸的Sunny一直瞞住家人，跟女友住的他一星期回媽媽家攞餸一次，分三日食，其餘時間一日一餐即食麵。不敢找朋友幫忙，理由是：「怕一開口人哋就以為我借錢。試過去社署想申請公援，但望見周圍都係帶住細路嘅女人同老人家，最後生係我，覺得自己好冇用，好慚愧，頂唔順，走咗。更覺得自己唔會搵到工做，重諗過去死……」
原來一切都是自尊心作祟，後來行街看見明愛職工發展計劃，想搵人傾偈解悶兼搵工。Sunny：「去得幾次，明白到只要肯（將煩惱）講出嚟，人哋未必畀到你實質幫助，但聽聽其他人意見，發現有時自己諗法未必啱，換個角度睇事情，心情會好好多。」今日Sunny任職侍應，仍等待時機做回文職。
大華的工作壓力並非來自老闆，而是他自己。大華在廚房工作近二十年，建立小康之家後，為了多賺點錢給小女兒讀書用，遂利用下場時間多跑一家酒樓做PartTime。一日跑兩場，放假就陪女兒去玩，完全冇休息。
結果是患上精神病，體力急速下降之餘，害怕在人多或擠迫的地方工作，自然丟了飯碗。經過兩年的精神科治療，積蓄耗盡，最終要領公共援助金度日。
「初時覺得原來自己咁冇用，要領公援，非常失落。」還好老婆同親人都好支持他，失業年多，大華都依然積極，現轉行做物業管理，但近年發現女兒好似對自己領公援抬不起頭，寧可更努力工作，節衣縮食，都停止領取公援，還想等體力好啲時，再返去飲食界闖一番事業。
以往只懂工作的大華沒有時間靜下心來，現在的他最愛到圖書館去看書，因為寧靜的環境可以讓他心情平復，好好想事情。
男士「人到中年」遇挫折或面對壓力時，由於男人自尊心作祟，不找人傾吐，壓力無處發洩時的常見以下現象：
1﹒多數醉心工作，期望自己有好前途，卻忽略情緒溝通。但人到中年，仍未見成就，生活又變得平淡，就會想找新衝擊，例如發生婚外情。不過很多時候，他們並不知道自己是否需要新愛情。
2﹒失去奮鬥目標，煩悶情緒讓部份男士會將精神轉向賭博、喝酒甚至吸毒，當作精神寄託，結果成癮。
3﹒失敗的無力感與自悲感無處發洩，就容易變得易怒，結果找家人發洩，變成家庭暴力。
