涂謹申中伏之後，原來工聯會亦唔乾淨，有「親中民主女神」之稱嘅陳婉嫻，亦被揭發夥同陳國強、梁富華等涉嫌挪用公款，用作工聯會私利。咁親中佬大罵涂謹申，又係為乜？個中原因，一諗就明。
講到利益衝突，近日中港官場耳語，玩得最嫻熟嘅梗係唔係陳婉嫻，而係我哋阿董。原來阿董唔知係想向歷史交代、定係同自己搭定後路，決定要起十號碼頭。根據港口發展報告，現時九號貨櫃碼頭都未用得晒，香港至少要到二○一○年之後，先至有需要研究應唔應該起十號碼頭，點解阿董咁心急，係都要喺任內完成？原來個碼頭係為航運設計，唔使諗，就梗係阿董家族嗰間東方海外多個立腳點喇！
側聞內地政府，包括粵省當局，對於阿董呢項計劃都有好唔開心，但由於我哋特首喺中央人脈廣，國家谷住條氣，有少少敢怒而不敢言。深圳個碼頭重有地方剩，霍英東個南沙開發區將來亦提供航運物流，整多個十號碼頭，分明係同國家對着幹，分薄廣東省利益。廣東啲官員更有意見，話中央又CEPA又自由行，援助香港一片大公無私，估唔到阿董咁反骨，為自己利益打算，臨走開個咁大嘅攤，大興土木，第三任特首上台，唔通夾硬叫停？
最離譜嘅就係，個十號碼頭，用香港納稅人公帑興建，耗資幾十億，最終得益最大嘅，係一間輪船通世界走、毋須喺香港納稅嘅航運公司，咁嘅利益衝突兼挪用公帑，唔勁過陳婉嫻事件多多聲？搵食使唔使咁狼？
好衰唔衰基建呢一樣又係香港內部事務，國家若然叫停，即是干預內政，但唔出聲唔等於冇感受，國家經已透過在港喉舌《文匯報》，十日之前登出一段新聞，講到明十號碼頭冇必要興建，請問特首，收唔收到？
其實阿董家族間公司，七年來不斷大展鴻圖，利潤增長經已係全港利潤飆升最勁嘅公司之一，喺上海圈地又得心應手。國家回報阿董，乜都夠晒喇，使乜再用香港人啲血汗錢起多座阿房宮呀？就算涂謹申加陳婉嫻，疏忽漏報又好、有心斂財又好，相比之下濕濕碎，喺香港重邊有天理？
傳真︰2623-9278
電郵︰