作為同康城影展及柏林影展齊名、稱為歐洲三大影展之一嘅威尼斯影展，噚日終於揭幕，呢個影展舉行至今已經係第六十一年，係世界上歷史最悠久嘅影展，所以能夠喺呢個為期十一日嘅影壇盛事入面放映嘅作品，都一定有番咁上下水準。而杜琪峯執導的《柔道龍虎榜》就會以非競賽電影參展，噚日佢已經抵達威尼斯。
今年總共有史上最多嘅二十部荷李活電影參展，其中由史提芬史匹堡（StevenSpielberg）執導、湯漢斯（TomHanks）主演嘅非競賽電影《機場客運站》重被選為開幕電影，湯漢斯前日已經抵達當地。另外羅拔迪尼路（RobertDeNiro）、阿爾柏仙奴（AlPacino）、梅麗史翠普（MerylStreep）以及湯告魯斯（TomCruise）等都會陸續到場，而十九歲嘅施嘉莉祖安遜（ScarlettJohansson）重係今年最年輕嘅評審㖭。
整個影展有來自二十八個國家共一百七十部作品參展，其中二十一部競賽電影爭逐最高榮譽金獅獎以及影帝影后等殊榮，入圍名單不乏亞洲面孔，其中包括台灣侯孝賢執導嘅日本電影《珈琲時光》、中國導演賈樟柯嘅《世界》，以及憑《千與千尋》先後攞過柏林影展金熊獎同奧斯卡嘅日本動畫大師宮崎駿，佢亦以新作《移動城堡》參賽。
另外金像影后妮歌潔曼（NicoleKidman）嘅破格作品《Birth》，同埋幾位著名導演如溫雲達斯（WimWenders）同邁克李（MikeLeigh）等都有新作入圍。