大戶收集完成，港股升浪再起，恒指衝上13000大關，收市13023，升173點，成交復增，有150億元。
今個升浪，由大藍籌行先，滙控（005）、中移動（941）同幾隻大地產股再發力，和黃（013）計劃下月分拆旗下環球電訊業務上市，套現約156億元，亦刺激股價造好。看好大市，大藍籌的Call輪可作為主力出擊對象。
國企再轉強，國指今次破位而上，初步目標指向4500。國指在4000至4500牛皮整固近3個月，大戶出盡法寶，又震倉，又壓價，收集應已完成，就以中國鋁業（2600）為例，上個禮拜，幾家大行前仆後繼咁掃貨，單禮拜四1日，成交已大增到9700萬股，股價其後上到3.975元，但前日，佢哋又係咁掟，最低質到落3.80元，佢哋重用大壓價策略，喺3.825元嘅「些那」，已掛到8球幾，擺到咁嘅陣勢，邊個夠膽掃佢？有貨在手嘅，相信有唔少震咗出去。噚日嗰啲大「些那」收咗手，中鋁又起番。
江西銅業（358）個勢又好勁，收3.70元，升0.125元，升幅3.5%，成交更大增到3843萬股。
江銅今年盈利大增，股價已大有上升條件，噚日消息傳來，又有銅礦工人罷工，令到原本供求已失衡的情況更加嚴重，對銅業股好有利。個多月來，江銅走勢形成頭肩底，今次突破頸線阻力，且有大成交配合，短期可向4.25元的量度上升目標推進。
今次罷工嘅係秘魯兩個銅礦，佔去年全球產量2.3%，消息刺激3大交易所的銅價上升。今年北美洲同南美洲的銅礦不時都有罷工，情況料會持續，並會支持銅價企於高位。
3個月前，市場預計今年銅供應短缺數字達75萬噸，比去年的36.1萬噸倍增，最新的數字顯示短缺可能會高達95萬噸，消息會刺激更多資金入市，追捧銅業股。
江銅今年產量增加，產銅42萬噸，增23%，黃金同白銀亦分別增產18%同27%，上半年獲利6.29億元人民幣，保守估計全年盈利12.5億元人民幣，每股盈利43.7港仙，05年上升至50港仙，以PE10倍計，上升目標指向5字頭。
郭兆誠