上星期五搵「信和」燈頭榮買鞋，諗住佢會畀折頭，點知都係收正價，佢話最多送條行貨Nike橡筋手帶補數。燈頭榮話：「咪睇小呢條Nike橡筋手帶，佢喺今個暑假賣到開晒巷，三、四十蚊條重有唔同顏色，每日閒閒哋賣幾十條，賣佢重好過賣鞋。其中有條黃色，上面寫住LiveStrong，即堅強過活，特別做畀環法單車冠軍岩士唐，因為佢喺97年頑強抵抗睪丸癌魔，好番後復出比賽成為六連冠得主，其不死精神喺美國大受歡迎，Nike咪以佢個名Armstrong出發，變成LiveStrong系列，出過鞋同Tee，全部屬限定版同慈善用途。最新就係呢條橡筋帶，原價1美金1條，已賣出幾百萬條，全數捐畀岩士唐基金。聽講Nike主席係佢個Fans，出呢條LiveStrong橡筋帶係佢嘅主意。不過行貨冇得返貨，上eBay搵每條唔計運費約$10-20美金不等。」突然省起，呢條手帶咪喺塗鴉界叔父Futura同本地嘅教父P手上見過？重有好多球星亦有戴，證明已成潮流標記之一，Nike度嘢確有一手！
主持人：大食Jack八卦熱報：
■記住LiveStrong橡筋手帶有兩個Size，男人戴成人，女仔就帶中童Size！