大市持續暢旺，噚日更係雞犬皆升，如果公司業績靚仔，股價更加表現卓越。
好似年初一度熱炒的蒙牛乳業（2319），噚日公布截至今年6月底止中期業績，盈利有成1.84億元人民幣，比舊年同期勁升1.42倍，唯一唔高興就係冇中期股息派。
經紀黃話，蒙牛業績今次真係靚爆鏡，日前有間樂觀嘅美資行，都係估升幅七成，今次公布業績超乎預期，小初真係估唔到祖國同胞咁鍾意飲奶。
今年上市以來，股價最高曾見過5.50元，但之後一來市況唔好，二來大陸牛奶市場競爭劇烈，行家減價令蒙牛毛利受壓，股價亦裹足不前。不過，相比其他同業，蒙牛比較新進，手法亦較進取，故此市場佔有率不斷提升。
經紀黃話，保母大摩在上市時，曾同蒙牛管理層以業績表現嚟對賭，連人哋大戶都冇有怕，小小散戶如小初根本唔使驚。
蒙牛受到業績靚消息刺激，股價噚日升4.08%，收5.10元，成交股數686萬股，金額3485萬元。
慕容小初