張國忠的藝能娛樂（國際）有限公司，昨日入稟區域法院，向張耀榮的耀榮娛樂有限公司追討八十多萬元欠款及訟費。張耀榮昨承認被追數，指那筆款項是當日收取了《左麟右李》演唱會門票未付款。
藝能娛樂昨日入稟區域法院，追討耀榮娛樂八十多萬元的欠款及訴訟費。原訴人為藝能娛樂（國際）有限公司經營藝能製作，被告人則為耀榮娛樂有限公司。
根據入稟狀指出，原訴依據一份日期為今年二月十六日的帳目報表，向被告申索八十二萬六千八百元，原訴於今年五月二十五日，接納被告要求將還款期押後三個月至上月二十四日，被告須於日期屆滿後三天內以支票方式還款。但被告在限期屆滿後仍未還款，原訴因此入稟法院追討欠款連訟費。
張耀榮昨日在紅館後台為劉德華演唱會打點，他直認被藝能入稟法庭追數，是當日買下《左麟右李》演唱會門票的欠數，張耀榮說：「唔係唔畀，係遲啲先畀，賺錢冇我份，蝕錢就有我份，合作咁多年，藝能嘅演唱會都係由我搞，買飛咪當投資，藝能當初夠話畀我一百巴仙製作權，之後愈cut愈少，最終都冇，第二輪演唱會又冇我份。」
張耀榮續說：「乞兒都會畀，之前一齊合作拍關於黃飛鴻嘅戲，都蝕咗幾百萬，我都冇出聲，亦冇查數。合作做生意係咁，有賺有蝕。」問到張耀榮和張國忠會否不再是朋友，他說：「做朋友唔係咁呀？」提到或會對簿公堂，張耀榮說：「我都唔介意，打官司啫，又唔係唔畀，遲啲先啫，我放喺銀行收息重好，如果對簿公堂，我會叫藝能拎啲蝕數出嚟睇。」身為藝能旗下藝人的譚詠麟（阿倫），對於張耀榮提及阿倫答應讓其擁有《左麟右李》演唱會股份，阿倫昨日在電話中說：「冇可能，我雖然係藝能股東，但冇可能咁講，演唱會嘅嘢交晒畀張國忠處理。」
案件編號：DCCC4550/04