近年積極喺大中華擴充特許經營業務嘅世紀21，區域董事吳啓民話，神州樓市場漸趨成熟，佢哋會努力搵內地加盟商。
佢哋四年前開始有加盟舖喺大陸落腳，𠵱家有三十幾個省市地區獲准開加盟舖，當中二十幾個市已經營運緊，包括上海、北京、溫州、福州、廣州、深圳同天津，約有四百間舖。出年諗住再增加二百幾間。
澳門亦睇好，皆因賭權開放後，經濟同地產市場都會欣欣向榮。今個月中會喺澳門開第一間加盟舖，到年底會開到五間。
至於扎根好多年嘅香港，見到樓市舊年開始反彈，經濟復甦，且有穩定增長，購買欲番晒嚟，因此，佢哋舊年至今，加盟舖倍增到九十間，出年百五間。
新地荃灣爵悅庭長跑式宣傳開始，晨早講明軟銷有排做，想知多啲實質嘢，睇怕記者同讀者要多啲耐性。
新地周國賢噚日介紹交通篇，提醒大家由爵悅庭去機場、迪士尼同中環，原來唔使二十分鐘。
既然咁近機場同迪士尼，周國賢強調，機組人員、外籍人士，都係潛在租客，雖然有排都未講得幾時賣樓同咩價，但已經決定同中原美聯合作，提供酒店式服務同一條龍租管。佢估計，長線投資者比例，應該會比其他新盤嘅兩成更多，預計有三成或以上會係收租客。
美聯劉柏兒噚日話，有個持外國護照中港商人，用二千二百萬，掃入三件鰂魚涌逸樺園，打算搞投資移民。三件貨嘅賣方，都係年初買入，各賺過百萬。其中一座極高層A，過千呎海景，賣八百二十萬，勁賺近百九萬。
聽講，個豪客係因為嘉亨灣好賣好炒先至入市，唔揀嘉亨灣而買逸樺園，可能貪現樓啦。
原來投資移民真係對香港有益，起碼帶挈三個投資者賺快錢。
豪宅價極速重返九七年高峯，短炒勁賺例子頻傳，心大心細嘅投資者，即刻湧入個市，希望撈吓油水，連超老牌屋苑荔枝角美孚新邨，都有初哥入市。
中原陳靄華報料，有個首次投資地產人士，一口氣買三件千二呎貨，用成千萬，淨睇銀碼，真係豪過好多中價豪宅炒家。
八月份美孚有八十幾宗成交，直追二、三月高峯期，呎價二千二百幾，投資客佔兩成半。
蘭西
電郵地址：
