董先生真醒，有好消息就自己爭住講。每季定期宣佈嘅GDP增長數字，本來係政府首席經濟師嘅工作，應該由茅以麗（署理）宣佈嘅，但因為所有人都知道上季（第二季）增長數字會達到12%，特首就要自己宣佈，唔知道以後每一季，係唔係都由特首親自出聲呢？鄧廣堯退咗休，冇升正茅以麗，重賣廣告招聘繼任人，好心畀茅以麗多啲出鏡機會，等佢捱咗成二十年之後，有機會升正啦！
又係嘅，董特首已經冇乜機會，滿面笑容咁見記者，有得威之時梗係要盡量把握，唔通你叫佢九月十三日待立法會選舉出咗嚟之後，肯笑住咁見記者咩。
宣佈第二季經濟增長12.1%，預測全年增長達7.5%之日，左丁山晚上去咗富豪飯堂食晚飯，咦，堂座滿晒噃，但去洗手間之時，就知道啲貴賓房空空如也。問句E經理：「今晚生意唔錯吖，上季GDP增長12.1%，睇怕你哋會V型反彈。」E經理苦住口面話：「唔該你多啲嚟幫襯，我哋從未捱得咁辛苦，舊年有沙士，好多人因為我哋夠乾淨衞生，唔去啲平價酒家，我哋生意都幾好。𠵱家呀，重衰過沙士嗰陣。昨晚老闆要我哋收工後開會開到兩點，諗方法，但出面實在太低價，我哋冇可能降到咁低格調啫！」
原來經濟增長與富豪飯堂生意背馳，真諗唔到，其中一個原因可能係經過幾年不景，間間公司都嚴格控制開支，公務應酬可慳則慳，請食飯唔可以太豪爽。譬如聽講蘇澤光上台後，不鼓勵電盈高層豪氣請客。以前有人經常出入福記，現在已經唔do啦！九七前大家夠豪，愈貴愈鍾意，現在所有一流貴價食肆都推出中午?晚飯套餐，世界唔同晒咯，即使通脹重燃，樓價再升，市民仍然會節衣縮食去供樓，唔會大增消費。