郭富城將於下月喺紅館舉行演唱會，佢已經三年冇開騷，心情未免好緊張。城城早喺半年前已着手籌備演唱會嘅細節，佢為咗畀歌迷有耳目一新嘅感覺，特別邀請美術指導張叔平同攝影師WingShya合作構思宣傳海報。
城城呢次演唱會嘅主題係「郭富城舞台寶典型@舞林大匯演唱會」，佢會將十年嚟喺紅館嘅舞台經歷一次過「晒冷」，張叔平特別喺城城赤裸嘅上身畫咗紅蛇圖案，馮仁昭驟眼睇落去覺得城城好似變身黑幫大佬。
張叔平話自己呢個構思係嚟自一個夢，佢話：「應承咗城城之後，我當晚就夢到一條紅蛇，就有靈感，赤膊係代表徹底演繹，而身上紅蛇係藝術同狂野結合。」城城一身假紋身畫咗五個鐘頭，大家見到都好滿意，佢話影完相返到屋企都要用半個鐘頭沖涼先沖得乾淨。
此外，城城重話最初呢個海報因為太性感，一度俾海底隧道禁賣廣告，怕會引起交通混亂，但後來改為大半身海報後，先可以逃過被禁嘅厄運。
梁思浩噚日到旺角為一間新開幕嘅食肆做剪綵嘉賓，思浩知道查小欣再次開咪鬧無綫嘅奧運主持，佢就替許志安抱不平，重暗寸無綫話：「畀個機會許志安，唱歌安仔好大家都知，但做直播主持係第一次，咁樣對佢唔公道，問題係在於揀佢嘅人身上，應該唯才善用，𠵱家令安仔做咗箭靶。」
馬浚偉即將加入劇集《皆大歡喜》嘅演出，噚日馮仁昭見到馬仔返去將軍澳電視廣播城試造型，戲中佢會扮演一名落難嘅有錢仔，重會同靚女鍾嘉欣有感情戲，馬仔話：「之前見過吓對方，人又靚又活潑，相信會合作愉快，而家燕姐方面就會少啲碰頭，都希望有機會合作。」
鄭文雅噚日到灣仔為慈善活動做宣傳，佢話自己即將參加月中舉行嘅行樓梯籌款活動，佢話：「平時都會行十幾層樓梯返屋企，練氣同當做運動，不過今次要行上七十五樓，成一千六百八十八級，我試過最勁行過八百級，今次一定會拉埋老公、朋友一齊行，有伴冇咁辛苦。」鄭文雅曾經係運動員，所以好欣賞劉翔，令佢非常興奮喎。
性感女星天心噚日喺台灣做雪糕宣傳，佢話出年就同卡地亞高層男友拍拖七年，如果可以安然度過七年之癢嘅話，佢哋就會結婚，天心用國語話：「屆時我不會穿婚紗，穿T恤和牛仔褲都可以了。這次我會主動向他求婚，因為以前他求過，但給我拒絕。」
