由於煤炭等燃料價格勁升，搞到大陸雖然鬧電荒，但一樣被基金沽售，多隻電力股股價都由高位回落。不過，舊年年底先至上市嘅華潤電力（836），剛公布中期業績靚過預期，獲得大行調升盈利預測，故此唔排除繼續有運行，股價繼續升。
華潤電力前日公布截至今年6月中期業績，盈利6.34億元，比舊年同期增長2倍有多，派發中期息2.5仙。
經紀黃話，分析員見完華潤電力管理層後，發覺公司賺咁多錢，除咗電力需求強勁外，成本控制亦做得好好，所以睇好華潤電力。
小初就覺得華潤電力有個好保母支持，亦係好重要，皆因公司公布業績當日，華潤電力股價已經升咗幾個巴仙，期間大摩買盤源源不絕。
華潤電力噚日冇起跌，收4.125元，成交股數647萬股，金額2661萬元。
另外，長升不跌嘅奇股南海石油（076），噚日終於上演一幕笨豬跳，股價半日勁跌88.87%，停牌前報0.37元。不過小初唔明，人哋只係話可能發行可換股票據，點解股價會勁挫？
慕容小初