莎瑪希恩低Ｖ致敬
Santana拉丁格林美獻技

最近美國樂壇盛事一浪接一浪，繼早兩日喺邁阿密舉行嘅第二十一屆MTV音樂錄影帶頒獎禮之後，第五屆拉丁格林美音樂頒獎禮又會喺今晚假洛杉磯雪蘭劇院舉行，一眾出席嘅歌手同表演嘉賓前日重好認真咁綵排。
而喺頒獎禮之前，前晚主辦大會亦搞咗個致敬晚會，表揚殿堂級拉丁結他手CarlosSantana，封佢為拉丁格林美年度風雲人物。上年曾經嚟過香港參加維港巨星匯嘅Santana，前晚亦以慣常嘅黑色打扮出席頒獎禮，而佢嘅太太Deborah同阿仔Salvador當然陪伴左右，分享Santana嘅喜悅。　　

與愛子合奏
不過身為主角嘅Santana不幸俾墨西哥性感女星莎瑪希恩（SalmaHayek）搶咗唔少風頭，皆因負責頒獎嘅佢着咗一襲超deepV晚裝，胸前雙峯呼之欲出，所以佢同另一頒獎嘉賓QuincyJones抵達嘅時候自然成為全場焦點。雖然Santana當晚着得相當四正，但係亦唔少得表演吓佢嘅結他絕技，而且重搵埋個仔彈鋼琴，嚟一次好難得嘅合奏。　　
此外，鄉謠界盛事第三十八屆鄉謠音樂協會頒獎禮已經公布提名名單，AlanJackson獲得年度藝人、年度男歌手及年度細碟等七項提名，而TobyKeith亦入圍年度藝人、年度男歌手同年度大碟等六項提名。