有時真係唔怪得啲球會唔肯放人踢國際賽，華倫西亞就係此中「受害者」。佢哋件後防大將艾耶拉，喺今個暑假除咗冇得跟球會展開季前操練，為阿根廷踢足美洲盃及奧運賽之外，臨歸隊前重要傷埋，起碼到十一月至能夠協助球會衞冕聯賽及踢歐冠盃！
艾耶拉係喺奧運足球決賽對巴拉圭，亦即係返球會報到前最後一場國家隊比賽至受傷嘅，華倫教練雲尼亞里除咗要鬧阿根廷之外，都只能歎句「整定」囉。
不過雲尼亞里都黑唔晒嘅，當年都叫做由佢帶出身嘅中場安古路，最後決定唔過檔阿仙奴，留隊報恩；隊波又喺聯賽首戰旗開得勝，贏咗維拉利爾二比一，算係咁啦！
好多人都覺得前曼聯前鋒科倫唔掂，今季佢轉投西甲球隊維拉利爾後，前晚首次上陣即取得「士哥」，以為可以叫批評佢嘅人收聲；但睇佢呢球其實有少少「撻Q」，對手華倫門將簡尼沙利斯之前救出多次險球，偏偏就俾呢球「撻Q」波射死，想唔話科倫「符碌」都唔得嘞。
重記唔記得拜仁慕尼黑前鋒薛基拿？呢位德國前鋒近年受傷多過食飯，最近一次受傷雖已係舊年三月對波琴嘅事，但到今日重未好得番。最近佢決定過嚟中國試吓中醫推拿，喺記者會佢就大讚好掂，復出有望喎！我求大俠都希望佢可以重拾雄風，令到祖國醫術發揚光大啦。
羅馬新教練人選揭盅，前德國國家隊教練禾拉正式上任；呢位球員時代亦曾效力過羅馬嘅射手，再度過意甲搵食。我求大俠對於羅馬呢個決定不置可否，雖則話禾拉當年都為球隊立過吓功勞，但佢教波經驗尚淺，帶領德國隊嘅戰績亦唔標青，乜羅馬真係冇得揀咩？
富咸右閘禾斯噚日對樸茨茅夫都算黑到痹，開波冇耐先俾人撞爆鼻，搞到件白波衫掛晒彩。換過件新衫，點知呢件冇「冧把」波衫重邪門，着唔夠一陣已經兩度要軍醫入場治療；下半場重衰倒被耶高保撞到飛入觀眾席，連累一位主場球迷俾自己踢「爆缸」，好彩對方事後唔追究。