恒指跌27點，好事也，等個市冇咁超買，奠定下次一彈而上嘅基礎。滙控（005）跌50仙，拖低恒指18點。滙控前周三除息之後，上兩級，停一停，大芬密密收。可能唔覺唔覺過多一兩個禮拜，回頭望一望，發覺乜原來又升咗幾蚊。
滙控C輪：滙控C輪值博率高。想搏殺，賭9876（個冧把好易記），10月中到期，輪價45.5仙，溢價1.3%，槓桿率26.6倍（有效18.1倍），引伸波幅15.8%。一個唔覺意，未來個幾月滙控升6元，唔算大貪，只係5%，則隻輪值90仙，啱啱係現價嘅兩倍。輪之為物，可以令人富貴，亦可令人閉翳，爆炸力同殺傷力係相對嘅。萬一滙控未來個幾月跌3元以上，則揸隻輪會totalloss。估吓將來滙控升幾蚊機會大抑或跌幾蚊機會大？
中企C輪：國企指數曾跌51點（1.2%），埋單只跌14點（0.3%），算係消化一吓。中電信（728）同中石油（857）分別跌兩格同1格，總共拖低14點，幾乎包晒國指跌幅。昨日推介嘅中企指數C輪9962，收15.8仙，啱執平貨。當炒熱門國企如國壽（2628）、上石化（338）、馬鋼（323）、燕化（325）等，好有勢，將帶動國指向上，揸9962有運行。
中石油C輪：中石油C輪9343，收70仙，跌1仙，跟正股回軟。隻輪12月中夠鐘，負溢價1.1%，槓桿率5.6倍（有效5.1倍），引伸波幅29.4%。正股若再跌，收集些少，博一兩分錢回報。正股起15仙至20仙，即刻目標可達。
章盛