昨日早市，滙控（005）成交金額曾被中國人壽（2628）爬頭，但午後滙控的成交迎頭趕上，買賣異常活躍，但股價則變動唔大。據聞午後買賣盤主要來自衍生工具發行商，暫時都唔知佢哋想搞邊科，但睇番沽空成績表，全日沽空金額達5.53億元，單是滙控就佔47%，加上期指未平倉合約超過10萬張，黑客估計大戶好大機會先殺好倉。
恒指噚日收報12850，跌27點，成交僅94.84億元，而滙控微跌0.50元，收121元，成交達10.3億元。
吉利汽車（175）中期純利勁升59倍至5443萬元，本來業績屬靚爆鏡，但點知仍被一波唱淡，評級由「中性」降至「跑輸大市」，原因是吉利管理層調低全年汽車銷售目標10%，反映公司都預期下半年汽車市場疲弱。結果吉利汽車股價先升後跌，挫3.53%，成交1101萬元。
上實（363）前日公布業績，管理層預示中芯（981）業績靚靚，市場隨即追捧同屬半導體股兼股價大落後的華潤上華（597），結果股價全日勁升10%，收0.54元，終於高過招股價0.50元，雖然成交只得280萬元，但總算是向捧場客有個交代。
繼中大娛樂（8167）之後，噚日南海石油（076）亦爆煲急挫，一度跌逾95%，中午收市前公司重話不明股價異動原因，但午後就停牌，話有股價敏感消息公布，停牌前報0.37元，跌88.87%，呢輪啲股仔真係令人膽戰心驚。Cookie話，今次聽講好似是有人刻意將股價質低，迫證券行斬孖展倉，然後低位收集。
阿虎