財務C呢日吃晚飯之時笑到四萬咁口，問佢係唔係升職加薪，攞咗大嚿option，財務C話：「邊有呢回事，即使有，亦唔會太︱︱高興，銀紙唔係咁重要啫！」財務C兩三年前信奉基督之後，成日去教堂做義工，脾氣純晒，以前久唔久就窒人哋唔識嘢，唔得專業，現在就猛話自己唔多識，唔敢講，宗教可以改變個人精神面貌，財務C就係一個活生生例子。
揭開謎底，原來財務C位千金在英國，讀寄宿學校，參加GCE普通程度（OLevel）試，十二科之中，考到十一科A，成績全校第一，明年考ALevel，入牛劍有望，你話到時一個唔覺意，C千金成為英國高考狀元，《蘋果》國際版可能有佢嘅相片出現。
香港學生到英國讀中學，平均成績非常好，據《經濟學人》講，族裔之中，亞裔學生最厲害，女仔又遠遠拋離男仔（此點與香港相同）。但係近十年ALevel試卷愈來愈容易，英國僱主對高考成績冇信心，故此現在考慮Agrade之中又分四級喎！
香港人成日鬧本地學生英文唔掂，其實英語水準下降乃係世界現象，英國學生咪又一樣，英文、數學成績都水皮晒，倫敦城市大學嘅精算學幾出名，一年級新生要補修微積分（讀精算學必需）。啲教授咕咕聲，話新生點解考完高考都唔掂喎！
既然如此，英國對全世界人士嘅英文失去信心，內政部長DavidBlunkett堅持任何人歸化英籍的話，必須考英文試，澳洲、加拿大、新西蘭人也不例外，澳紐報紙為之嘩然，紛紛取笑BBC啲警匪片內嘅角色都唔知係講乜嘢方言，總之唔係英語，但亦都有紐西蘭學者話當地年輕人分唔清cheer,chair；beer,bear；ear,air之發音分別喎。