恒指高低波幅99點，埋單有59點進帳，來回拉鋸，當作消化，消化過後，再上一層樓。短線炒作策略，係吼位買C輪，而唔係吼大市升博回頭買P輪。
中企C輪：國企指數升幅，大過恒指與紅籌，有成份股國壽（2628）、中石油（857）、中石化（386）、人保（2628）、中鋁（2600）等帶住上。5「大寇」拉高國指共58.94點，佔咗國指升幅71.41點大部份。睇嚟，呢啲重磅國企個別會繼續拉高國指，又或者其他國企股追番上去，左計右計國企指數都係向上移動。既然係咁，炒中企指數C輪會係搵米之道。
炒中企指數C輪，正印係9962，年尾到期，輪價16.4仙，溢價4.7%，槓桿率8.5倍（有效5.7倍），引伸波幅38%。打和點係國指4508，國指昨收4306，你估未來4個月，國指會高過抑或低過4508？中企C輪9948都好多人玩，槓桿率大啲，不過壽命短兩個月，而溢價又有3.6%，買9962安全過9948。
電盈C輪：電盈（008）收5.15元，冇郁，隻X輪9762則升19%，收8.6仙，唔係乾炒，有97球易手，金額接近900萬。9762重有1個月命仔，睇比聯個網站，實際溢價5.7%，有效槓桿率5.2倍。如果覺得正股有得睇，炒電盈C輪，應該揀長命啲嘅正規輪9814，明年1月中夠鐘，時間值着數啲，輪價62仙，溢價8.9%，槓桿率8.3倍（有效5.2倍），引伸波幅40%。隻輪早前冇乜成交，𠵱家每日有幾球，識貨之人收集緊。
章盛