北京市市長王岐山喺奧運閉幕禮上，由雅典市女市長嘅手中接過了奧運大旗，好熟練同有功架咁搖擺咗幾下（圖），正式擔起北京○八年主辦奧運嘅大旗。
希臘今次無風無浪地完成壯舉，所謂珠玉在前，人哋做得咁完美咁有感覺，中國唔可以衰畀人睇，所以王市長不敢怠慢，呢個星期四會親自帶團，好似話帶埋支奧運旗嚟香港，出席第八屆京港經濟合作研討會，除咗要加強兩地合作之外，最緊要就係向港商推介奧運經濟市場，講白啲，即係嚟叫香港班富豪有錢出錢，有力出力。
王岐山肯定見過世面，亦為港人熟識，九九年佢做緊廣東省副省長嘅時候，就因粵海企業債務問題同香港商人打過交道，亦知道李國寶唔係好欺負。
之後呢位原籍山西嘅明日之星調咗去海南省做書記，舊年北京發生沙士，孟學農即時下馬，王岐山臨危受命，可算係頂得住，今次奧運首次喺北京舉行，全世界都睇住，認真係考佢牌。
傳真︰2623-9278
電郵︰