劉德華一連十五場嘅《VisionTour2004演唱會》今晚開鑼，為咗今次演唱會，華仔專程鏟咗個超短嘅「鮑魚刷」頭，希望令大家眼前一亮。原來華仔喺鏟頭之前，曾經想過駁髮，但係思前想後，最終都係下咗呢個決定，佢話：「我拍《無間道》嗰陣，唔少人都讚我短髮look好睇。」
前晚華仔第一次去到紅館綵排，據知今次舞台設計係紅館有史以來最高嘅一個，就連華仔都忍唔住跑上第二十行坐一坐，佢話：「嘩！真係歷史性嘅第一次，原來最佳位置係第十五行之後。」
另外，華仔早前度身訂做咗部收音效果極好嘅耳機，華仔第一次試戴，話連工作人員嘅電話響聲都清楚收到，佢重話：「假如坐滿觀眾，萬幾人之中有一千人電話響，我都唔得掂。我諗要通知一吓入場觀眾要熄晒啲電話，邊個話唔聽俾我捉到，就罰佢上台唱歌！」
林嘉欣最近幫「四洲梳打餅」做代言人，聽日有關方面會喺尖沙嘴為佢舉行記者會；而早幾日嘉欣先至拍完呢個電視廣告，喺裏面嘉欣攞住弓箭扮愛神，造型都幾可愛。不過原來嘉欣要喺廣告入面飛嚟飛去，第一次吊威也嘅佢，驚到震騰騰㖭！
泰國電影《美麗拳王》將會喺本港上映，男主角亞山里蘇璜同導演亞格差烏干騰前晚出席喺海運戲院舉行嘅首映禮，亞山里話拍完套戲後覺得自己乸乸哋，好彩重鍾意女人！而主角嘅真身朗東都有嚟支持，佢變性後喺泰國做打拳教練同兼職模特兒。
中華台北代表陳詩欣喺奧運跆拳道上攞咗金牌，香港澤星電影有意以佢做題材拍成電影，初步屬意由張栢芝演繹。經理人陳嵐話栢芝要視乎電影製作先可決定演唔演。而陳詩欣用國語話：「我看她跟謝霆鋒離離合合，就知她個性固執，適合演我。」
英皇新秀歌唱大賽2004已經選出咗中港兩地十位參賽者，九月初先喺香港比賽，勝出者將會晉身全球華人新秀歌唱大賽，有機會一夜成名之餘，重可獲得十萬元及英皇合約或無綫藝員合約，而香港嘅參賽者即將到北京同內地參賽者交流。
