香港同內地經濟交流頻密，好多商家同高級行政人員，頻頻撲撲兩邊走。
喺港島半山、上海北京同深圳，都有收租豪宅或服務式住宅嘅嘉里，租客好多都係呢類人士。有見及此，於是諗出不如統一呢幾個地方管理服務標準，無論租客同佢哋屋企人去到邊，都保證享受到最貼身服務，照顧佢哋一切衣食住行玩咁滯。
現即時享有呢種服務嘅，包括半山四個豪宅、北京同上海嘉里中心服務式住宅，涉及單位五百多個。
此外，嘉里又搞通訊，同臻善譜雜誌，定期送畀租客，介紹啲出租單位，同教佢地點樣追求唔同生活模式。
另為突出佢哋半山豪宅地段嘅尊貴，限量印本講半山歷史嘅書仔，裏面有唔少中環同半山珍貴舊相。
藝人馬德鐘，憑劇集《衝上雲霄》一炮而紅，由佢飾演嘅飛機師，形象深入人心，人氣急升之餘，俾廣告商睇中拍修身廣告，兼做代言人，豬籠入水，荷包腫脹。
近排雖然忙於主持奧運，都爭取時間，四出搵樓，集中火力搵住開嘅西貢區，睇樓只有一個禮拜，已經扑槌，買入碧翠路寶珊苑頂層連天台，千二呎，天台一千呎，作價四百萬，每呎三千三。
世紀廿一張勵山話，寶珊苑環境清幽，私隱度高，鮮有放盤，吸引馬德鐘火速成交。
奧運結束，不過奧運精神，噚日喺中原碧堤半島二期嘅誓師大會延續。為咗獎勵喺一期做得好嘅代理，特別請咗九倉黃光耀頒發金牌，包括成交最多、金額最大等獎項。中原重鑄造印有黃生樣貌嘅金牌，封九倉做金牌發展商。
噚日係第一個經紀誓師大會，黃光耀特別落力，帶上印住碧堤嘅紅色綵帶，造型十足十選舉候選人，重話自己係新界西2號候選人，呼籲大家投佢一票，亦即係入票認購碧堤，而營業經理梁秉權，就忽然成為佢嘅競選拍檔。
經紀為咗大刁，真係會博到好盡，好似美聯承德山莊分行，近日就不惜出錢出人。
區域經理黎志強話，由於業主身處澳洲度假，加上又係周末，於是由公司出機票，用咗成六千幾，派出新人女將VieenLai，飛足九個鐘，去到澳大利亞，親自找業主搞掂張單。
賣出貝沙灣二期南岸二座高層A，千三呎，近九百八十萬，幫賣家賺咗近二百五十萬，於是大家合皮。
唔少老闆級人馬，都會趁暑假去旅行，利嘉閣廖偉強，就趁新一輪新盤潮開始前，上周去東京旅行充電。
雖然話，今次旅程大多吃喝玩樂，但聽廖董講，都有唔少新發現。
例如食壽司通常都會食芥辣，廖董發現，想食芥辣，但又唔會流眼水，方法係食嘅期間用鼻吸氣，用口呼氣。
早排亞視套開心大發現，都有類似嘅秘技，不過廖董咁忙，應該冇睇過，唔算抄橋嘅。
蘭西
電郵地址：
