雖然中聯辦將白鴿黨羅致光入唔到上海境嘅責任孭晒上身，話係佢哋有關人員嘅錯，通知唔切上海公安同邊防，但係香港人都會覺得上海朋友不大友善，送人走之前肯定要諗吓後果同形象，使唔使咁唔畀面？
反觀我哋以老董為首嘅香港特區，就好客得多，你邊個省市領導嚟都一樣歡迎，自由行更視為上賓，連為港增光嘅高禮澤同李靜嘅父母親我哋都招呼埋，請佢哋噚日嚟香港，等兩個乒乓球銀牌得主今日返嚟香港，第一時間一家團聚，你話幾唔話得呢！
老董就係太唔計較，任人欺負自己嘅議員同居民，咪搞到冇人服佢，你試吓佢老哥即時向上海市市長韓正交涉，肯定民望大升。
老董對住中國人都係冇乜法子，只係識叩頭，不過，對住啲外國人，就成個正常番，好似噚日，佢就好大方得體招呼皇家飛利浦電子集團總裁柯慈雷，多謝人哋喺香港投資，以香港為亞太區總部。
（圖）行政長官董建華噚日會見皇家飛利浦電子集團總裁兼首席執行官柯慈雷（左）。 政府新聞處圖片
傳真︰2623-9278
電郵︰