話咁快暑假又放完，上兩個星期由於《WE8》效應，大部份廠商都以二線遊戲為主，好似今個星期，由近期開發水準勁跌嘅SEGA，推出《VIRTUAFIGHTERCYBERGENERATION》，用《VF》名氣掛帥，但係內容並非格鬥，以原創角色學習VF人物招式玩群揪，意念不俗，可惜人物造型麻麻，市價$360，反應只算一般。而同日隻《煉金術士2》雖然喺動漫畫上大熱，但由於冇行貨，Game舖又冇乜人返貨，搞到市價要成$460。反而近排PS2嘅周邊LAN配接卡就頗為好賣，貨源充足關係，市價由$220回落到$180。而好耐冇提過嘅GC，最好賣依然係自家嘅《PIKMIN2》同《紙板瑪利奧》，市價終於回落到$320度。XBOX今個星期就由《RAINBOWSIX:BLACKARROW》做主打，上集反應咁好，相信今集唔會差得去邊，行貨定價$299。
繼香港同台灣之後，今年任天堂亦喺大陸推出行貨GBA主機，取名「小神遊」，而隨主機亦推出咗中文版GBA遊戲，是次任天堂中國行貨GBA，主要打擊國內大量二手翻新GBA市場，大陸官網亦有教客人如何分辨翻新機嘅資料，不過香港就簡單地用包裝同隨機附送嘅保用證嚟分辨行貨同水貨。據鐵人知道，市場上有唔少不同代理商嘅保用證，而唔同保用證當中有冇問題，等下星期鐵人向代理查詢之後，再同大家報道一下。