晚上看奧運直播，連帶將所有電視廣告一併吞入。某信貸財務公司最醒，購下跳水項目的特約環節，該公司的市場推廣人員定必是個奧運迷，知道本屆奧運中國最穩陣奪獎牌的項目是跳水，田亮、郭晶晶、彭勃等名將統統成為信心指標，運動員表演出色，奪得金牌歸，觀眾睇得興高采烈，見到金牌亮晶晶，想起袋裏沒有錢，借番三幾千贈吓興。
一系列的化妝品廣告，以往曾經興過古銅色肌膚，如今無端端又興番一白遮三醜，以往講究的是白裏透紅，後來雪白，跟住美白，如今突然殺出一個激白。記憶中最激白的表表者莫如MichaelJackson。咁重唔止，重要零毛孔，大家平時出街個樣都要好似俾電腦執過，塊塊面滑到好似膠一樣，咁重唔止，最新口號係「想靚？肌膚一定要透明」嘩！正呀！肌膚透明，好似《透明人魔》入面啲猩猩一樣，肌肉、血管、動靜脈一清二楚，諗起都夠娛樂性，慳番唔使去金魚舖買玻璃貓。
一大堆長氣兼悶氣的政府廣告，換身份證、投票、預防疾病，由於政府覺得自己講嘢又要斯文又要大體，於是講一大輪，其實講兩句說話就搞掂，例如「參與售賣翻版光碟，損害一生前途」，不如簡單地講：「賣老翻，等坐監」算數。