噚晚舉辦嘅「紀念鄧小平百歲誕辰座談會」，竟然演變成鬧劇一場，事緣座談會請咗嘉賓胡漢清、邵善波、胡應湘、陳弘毅等人做講者，身為大律師嘅胡漢清講講吓，講到離晒題，扯到CEPA冇雷公咁遠，都唔知同鄧公百歲冥壽有乜關係，之後佢又扯到去23條立法，力挺23條應該立法，香港舊年冇立到法，係對唔住國家。
一向有正義感嘅胡應湘（哥頓）呢個時候插嘴，話上年大家反對23條係有理由，如果警司可以隨隨便便入屋，買本書又可能出問題，都幾大件事。佢又暗寸胡漢清，話有啲人掉轉頭擦鞋，但擦得太緊要都係唔得。胡漢清當然忍唔住要反駁，話自己唔同意23條嘅內容有問題，因為比起其他國家已經好寬鬆。
佢兩個你一言我一語嘈起上嚟，台下即時有阿伯大嗌，叫佢哋唔好討論23條好唔好，因為呢個係鄧小平座談會，場面即刻一片混亂失控，有人和應，又有人反對，卒之要胡應湘打圓場，話好好好，大家講番鄧小平精神，胡漢清就表現得尷尷尬尬。
傳真︰2623-9278
電郵︰