羅致光上海被逐事件，出現神秘轉折，中聯辦副主任李剛話，經查明，確係有一名「工作人員」話畀阿羅聽，佢去上海開會冇問題，點知該名「工作人員」並冇向上面「查詢」，結果就發生咁嘅事。李剛又話，呢件事唔影響民主派人士同中聯辦授權嘅「溝通」。
咁騎呢，一名「工作人員」講過嘅，竟然無法兌現，佢又冇與上高核實，咁係呢名「工作人員」疏忽失職、有心整蠱，定係上海邊境當中聯辦嘅「工作人員」冇到？
「工作人員」明明話羅致光不在「黑名單」之內，即是佢親眼核對過。點解上海邊防公安又有另一張黑名單，又以邊一張黑名單為準？港方人員既然話黑名單冇名，又何需再向上海方面徵詢？係電腦有錯，定係人腦有問題？
國家副主席曾慶紅明明話過，中央政府同香港民主派並無矛盾，因此亦無所謂和解。咁點解上海邊防公安又話羅致光入境會「對國家不利」，並且話佢自己「心知肚明」？堂堂領導人係講嘢兒戲，定係說話唔夠力，下低陽奉陰違，定係祖國經已提前實行鄧小平所講明唔會搞嘅「三權分立」，互相制衡，你話可以入境，我就話唔畀；你話大家友好冇矛盾，我就話你想搞垮中國。
何偉途北上東莞，失手被擒，又屬唔屬於冇溝通？既然李剛話係自己內部溝通有問題，又點解唔即時補發回鄉證畀羅致光，畀佢即刻返上海？
一啲咁怪嘅事，發生喺紀念鄧小平一百歲忌辰嘅敏感時刻，又撞正立法會選舉，上高究竟搞緊邊科，香港人唔明，睇怕董班子亦唔明。
IQ一百六十嘅羅致光俾佢嚇一嚇，話好「失望」，以後有排唔會北上。至於「溝通」，咁就聽其言，觀其行，民主黨人士唔參選，去上海，都要沒收回鄉證，行動經已說明一切，都係啲老左睇得通，大罵一場「假溝通」，假就假嘞，不過假嘅未必係民主派喎。
（圖）楊瀾（中）向李剛（左）同城大校長張信剛（右）介紹佢份新周刊，李剛之後爆料話羅致光的確喺去上海之前問過中方。
傳真︰2623-9278
電郵︰