簽完富拿再買D卡馬拉
球驗客手記：老樸入球靠晒「黑色力量」

球員轉會市場喺香港時間今晚就會關閉，除咗曼聯搵朗尼外，樸茨茅夫領隊哈利列納亦唔執輸，簽摩德納前鋒D卡馬拉，實行前鋒線全部用「黑色力量」。
哈利列納前季尾就簽咗尼日利亞嘅耶高保，季前亦羅致咗剛果嘅路亞，上個禮拜加盟嘅普雷斯頓前鋒富拿，雖然國籍係牙買加，但亦係黑人；加埋呢個以二百萬鎊轉會費加盟嘅塞內加爾前鋒D卡馬拉，正選後備前鋒都係「黑色力量」，喺英超聯真係獨一無二。黑人擁有優秀運動細胞的確係事實，哈利列納今次呢個「黑色力量」計劃，可唔可以喺英超衝出一條新路？真係要長遠睇，好彩唔使sell波衫，怕且銷量‥‥‥。

保頓利記西國兵互攬甘普值得同鄉敬重
前日保頓主場贏利物浦，眾西班牙外援難得聚首一堂；睇新加盟「利記」嘅阿朗素、路斯加西亞同保頓嘅甘普相擁，令人深深體會他鄉遇故知嘅情懷，阿朗素、路斯加西亞對甘普態度睇嚟相當敬重。甘普響英超站得住腳，有一定江湖地位，就算唔係隊友都有機會得到佢關照啩。

左路人齊再買葡新丁車仔埋門添兵夠騎呢
當車路士早已宣布完成擴軍，前日失驚無神喺葡乙彭拿費爾引入莫拉斯，夠騎呢。消息一出，好多人即刻起佢底。原來呢個二十歲葡國仔踢左閘，照計「車仔」左路有布歷治同埋巴巴耶路，佢暫時難有發展，怕且好快就好似上季施馬田咁被外借出去。過客啫，大家暫時唔需要太着意。

投阿美利加即入波查明夏墨國發展掂
潮流果然興「處子演出」即刻有士哥，曾效力拉科魯尼亞嘅前巴西國腳中場查明夏，前日第一次為墨西哥勁旅阿美利加作賽，臨完場前就射入個靚自由球，幫球隊迫和拉古納一比一，令教練勒基利可以鬆一口氣。雖然查明夏已經三十三歲，但波底唔錯，應該響墨國有一定發展。

有波入踢走霉運高路斯鹹魚翻生
前日雲達不來梅主場爆冷輸畀禾夫斯堡一比二，今季慘被破身。唯一令擁躉安慰係加盟以嚟霉到冇得再霉嘅射手高路斯，終於有波入。雖然呢個波只能夠「破蛋」，冇乜實質意義，但總算重拾射門鞋。望就望佢真係可以鹹魚翻生，話晒德國國家隊有份量嘅前鋒，五隻手指數得晒。