半個月前公布中期業績差過分析員預測的創科實業（669）噚日停牌搞收購，原來終於落實收購歐洲業務，大嗱嗱斥資7.13億美元，向瑞典公司收購電動工具生意。
雖然收購代價唔細，但經紀黃話有分析員睇好創科，覺得佢哋行呢步棋係正確。小初就唔敢表示意見，皆因咁大單生意，短時間內實在難以評論掂唔掂。
小初早前曾提過，創科在公布中期業績前，股價忽然下跌，結果創科中期盈利只有2.99億元，低於大部份分析員所估計的3億元樓上，跟住有分析員調低對創科的盈利預測。
雖然係咁，但創科股價反而硬淨咗，上周五停牌前報11.90元。經紀黃解釋話，皆因芬佬相信創科將於短期內在歐洲有收購，改變一直過份依賴美國市場的情況，𠵱家收購果然成真，雖然作價唔便宜，但因創科早排配售過可換股債券集資，相信錢方面唔係問題，唔使再在市場抽水。
另外，股價一直長升不跌的南海石油（076），公司終於出嚟打開口牌，話可能發行可換股債券集資，但股價反而下跌2.2%，收3.325元。
慕容小初