陽光媒體吳征同楊瀾夫婦為咗宣傳份新嘅中文商業周刊《觀察星報》創刊，噚日特別出動一艘遊艇，喺上面開雞尾酒會，除咗請記者之外，重請到中聯辦專責新聞媒體嘅李剛做貴賓。
楊瀾佢哋份周刊威在可以喺全中國發行，有國內重磅人士做評論同分析，內容以中國嘅商機為主，重有報道關於中國嘅法規。楊瀾大姐盛裝出席，攝影焦點梗係離唔開佢啦。
當然記者冇諗過會有意外收穫，因為李剛呢輪日日出鏡，前日先講過嘢，點知未落船，佢就自我引爆，話中聯辦喺羅致光被拒入境事件上搞錯，你話係咪好少有。
一位熟悉中方運作嘅人形容，李剛屬於新派共幹，所以錯了肯認，如果以前，就好少有，呢個可能係真，但係佢前日唔應該未問清楚就去答記者，重有未同上海打招呼，又點可以發個錯誤訊息畀羅致光入境。
總之疑點多多，分分鐘係有人食死貓，或者係有重磅人出咗手，唔認衰咗都唔得。
傳真︰2623-9278
電郵︰