成功在嘗試，也要有恒心。晉誠地產嘅張秋同胡卓輝就係一例，佢兩位原先喺大行印印腳做經理，竟然膽粗粗喺舊年三月，正值沙士爆發初期，自立門戶，喺荃灣海濱花園開地產代理，做街坊生意。
後嚟疫潮漸退，兩兄弟開分行，揀咗屯門區做樓上舖，專做青山公路沿線物業。𠵱家見生意都唔錯，決定開番間地舖做大佢。新舖喺青龍頭，地方有成五百幾呎，員工總數八個。今次開舖，用咗接近二十萬。
張秋話，睇中間舖好耐，經過大半年不斷同業主傾，最近先傾掂可以開舖。條件不但要向現有士多租客補錢，重要將舖頭門口一角，免費留畀原租客繼續做書報攤。佢話，青山公路豪宅多，發展空間大，既然睇好樓市，所以下定決心再開新舖。
自從今年初，樓市飆升之後，筍盤已經好難搵，個個業主都趁勢將個叫價大加特加，即使係銀主貨，開價幾乎都貴過一般二手盤。
好似小西灣藍灣半島一座高層D，近千一呎，話就話有海景兼新裝修，不過銀主三月份初次放盤時，開價竟然高達六百一十五萬，幾乎五千八蚊一呎。
雖則話當時樓市好景，但都唔係個個港島東屋苑可以做得到呢個價。所以一直都冇乜人吼，加上樓市進入咗整固期，銀主惟有不斷降價，前後一共減咗四次。
呢件藍灣貨日前終以低於首次開價兩成四，即四百七十萬賣出，每呎四千四，正常好多。
美國兩度加息，香港優惠利率冇跟，但同業拆息就升咗，過去用拆息計算樓按息率，享受低息嘅業主，可能要改用其他樓按產品。
聽講，好少樓按用拆息，每月僅兩三個巴仙。就算三月高峯期，都係得四五個巴仙。
今年頭七個月，拆息做樓按，四成係用三個月同業拆息計算，其次係十二個月，溢價半厘或以上。
拆息樓按到期可以免費轉為其他按揭產品，利率可以低至P減兩厘七五，不過，想再平啲就難嘞。
投資物業突然興旺，大手成交頻傳，但業內人士話，整體其實少咗。
原因係摸貨冇以前咁多；散客少咗入市；年初購入而未出到貨嘅炒家，亦暫時收手。
成交主要都係商舖，寫字樓停滯不前。
甲級商廈因業主唔肯減價，買家自然卻步，反而乙丙級商廈業主願意降價，所以重有啲成交。
乙丙級商廈呎價回落到唔使兩千，有啲只係千零。
所以較優質嘅乙級商廈，好似灣仔英皇集團中心同北海中心，都見有買賣。
台灣歌星張惠妹，早幾日以台灣觀光大使身份嚟香港，去咗奧海城，出席一項台灣旅遊宣傳活動，其間順道去埋場內嘅蔚藍灣畔售樓處參觀。
咁啱，信和嘅韓家輝都在場，當然齊齊影番張相留念啦，聽講重喺售樓處內，拍咗少少嘢㖭。
近排張惠妹無端端捲入兩岸政治爭議，唔知有冇影響佢睇示範單位嘅心情呢？
新地周國賢賣樓向有個人風格，短期內由佢負責推銷嘅新盤荃灣服務式住宅爵悅庭，上周展開宣傳。周國賢噚日出席保良局月餅義賣活動，老記自然唔放過，追問爵悅庭最新進展，不過周生貫徹一向作風，唔講樓盤、齋講樓市，對於樓盤資料、定價、銷售進度等一律賣關子，情況就好似去年賣元朗YOHOTown一樣，連續幾個禮拜，日日開記招，開足一個月都未入正題。
今次周國賢重事先聲明，喺未來一個月，會同記者頻頻見面，不過最關鍵嘅定價，肯定唔會咁快講。
睇怕今鋪，支牙膏重襟唧過上次。
蘭西
電郵地址：
