早幾日有人同馮仁昭爆料，話近日頻頻見許冠傑（Sam）喺大埔滘豪宅御泓居出現，懷疑佢為咗避狗仔隊而搬離大埔康樂園，去咗御泓居度住。但據馮仁昭所知，阿Sam的確租咗御泓居一幢別墅，但就唔係用嚟住，而係用嚟練歌同開會嘅私竇！
原來阿Sam見之前無論練歌或者開會，都要長途跋涉出九龍，又不時有狗仔隊追訪，所以即將喺十月開騷嘅阿Sam，索性喺屋企附近搵個竇嚟練歌開會，結果就搵咗地方隱蔽、保安森嚴嘅御泓居囉！
馮仁昭聽聞阿Sam今次係以佢公司恩典園嘅名義去租別墅，成幢別墅三千幾呎，月租大約三萬五千蚊。
前日下晝四點幾，馮仁昭果然喺御泓居見到阿Sam同班演唱會工作人員出現，雖然嗰度地方隱蔽，但阿Sam為免有狗仔隊跟蹤，出入時特別搵人幫佢睇水，然後一個箭步上咗架有窗簾嘅七人車離開。
徐熙媛（大S）同周渝民（仔仔）日前喺台灣一幢大廈天台拍攝劇集《戰神》。為咗避免曬到烏卒卒，大S除咗着兩件衫包到實外，重要工作人員幫佢撐傘遮太陽。劇情講大S同另一演員湯志偉喺大廈天台拉扯，好彩仔仔及時出現英雄救美，事後大S重攬實佢影相㖭！
張達明前晚喺藝術中心為「明照藝術行動」亮燈儀式表演棟篤笑。佢話藝術中心搞咗啲活動，畀小朋友學嘢，所以都想叫個仔學。
達明話：「我個仔好叻，但怕醜，又怕痕怕痛，希望參加呢啲班可以幫到佢啦。」達明話忙於同吳鎮宇及黃子華為《鬚根show》第三集開會度橋，認真百足咁多爪！
陳鍵鋒噚日去屯門出席「信和動感勢運會——十項全能競技賽」。有份主持奧運節目嘅陳鍵鋒話做完奧運係大解脫，因為有太多批評，公司又提醒佢唔好講咁多廢話，搞到壓力大又緊張。至於即將舉行嘅無綫奧運騷會飛起葉璇，陳鍵鋒話應該搵個有份量嘅司儀孭飛，咁至尊重啲奧運健兒。
顧紀筠噚日喺尖沙嘴出席「盈康會會員大會2004」活動後，即趕去機場同老公去美國擺喜酒。顧老闆四月先同無綫續咗新約，但話咁快又滿騷。無綫一班奧運主持頻頻俾人批評，顧老闆話無綫需要有冒險精神，不過佢好同意鄭裕玲話：「我哋主持貴得有道理。」
