早幾個月前，大陸公布搞宏觀調控，大陸地產股全線冇運行，紛紛跌至全年低位，但隨着大市回穩，加上個別股份業績出色，唔少大陸地產股都展開反彈，好似早前的上海復地（2337）及剛在上周公布中期業績的上海置業（1207）。
上海置業上周公布截至今年6月底止中期業績，股東應佔溢利5721.7萬元，比起舊年同期上升50.8%，連最樂觀的分析員都估唔到咁靚，由於公司今年內繼續有地產項目出售，有一定盈利可以入帳，所以大行急急將盈利預測同目標價調升。新報告一出，上海置業上周五股價即刻有反應，大升7%，收0.61元，成交金額727萬元。
經紀黃話，上海置業向來都有芬佬捧場，包括金手指在內，雖然早排大陸不時傳加息，令地產股備受冷落，而金手指曾經作小量減持，但仍然持有超過5%，反映佢哋對上海置業仍有一定信心。
此外，上海置業喺今年3月份曾發行可換股債券，集資成3億銀，照計公司手頭銀彈充足，足夠作發展之用。
慕容小初