一味窩輪:短線超買候低揸C輪

一味窩輪:短線超買候低揸C輪

上周,恒指共升441點,升幅3.6%。油價散落嚟,對外圍股市同港股有利好刺激。港股已轉勢向好,但短線有啲超買,恒指同好多隻大藍籌,9RSI日線都上到80甚至更高水平,不過周線圖則重係OK。炒輪策略,係吼大市回吐喺低位買C輪。咪貪心博大市回落買P輪賭多一手,咁做法萬一遇上挾多一次空倉,可以輸到焦頭爛額。
恒指C輪:恒指C輪正印係9773,對恒指反應跟到實一實,因為平水咁滯。隻輪9月尾到期,最後交易日則係9月22日,即剩番18日買賣,輪價15.2仙,溢價0.1%,槓桿率15.3倍(有效12.9倍),引伸波幅22%。過去1個禮拜,升幅高達65%,可先行獲利離場,吼住有適當調整時上番車,亦可吼過第2件恒指壽命稍長嘅C輪,就係9911。
9911漸成恒指C輪熱門主角,取代9773。隻輪年底到期(年底來臨前炒年底例旺),輪價16.3仙,溢價3.8%,槓桿率18.3倍(有效10.2倍),引伸波幅21.4倍。等機會喺低位上車。
華能C輪:華能國電(902)早前派中期成績表,散咗一輪,𠵱家已復常態,喺6元以下反覆一輪,有機會上破6元再表演。
等吓,吼每次華能跌一跌,買華能C輪9197。隻輪明年1月尾到期,溢價17.2%,槓桿率12.9倍(有效5.6倍),引伸波幅43%。隻輪數據唔算靚,但已經靚過其他華能C輪,壽命有咁上下,不必過於計較啲數據。
章盛