祖雲達斯前日喺貝盧斯科尼盃作客贏AC米蘭後，總監莫治公布會方落實引入簡拿華路嘅消息。呢位意大利國家隊隊長留喺國米都唔慌有前途，難得有機會同保方、杜林重組當年帕爾馬後防鐵三角，「打救」近期後防唔多掂嘅祖記，做英雄，唔怪得據報佢減薪都肯制囉。
截稿時祖記已經同國米傾掂數，爭在未同簡拿華路傾個人條件，而據講簡拿華路肯減薪過檔（減幾多就未知）。
又係嘅，國米新帥文仙尼帶埋親信米赫洛域、費華利加盟，重有哥度巴、馬達拉斯、貝迪素等咁多守將，佢唔走怕且都難有正選。近年祖軍守力轉弱，只要佢表現唔差得過甩漏王歷高達利、蒙迪路，球迷應該都收貨；有佢老友杜林、保方幫手，斷估「大簡」真係加盟祖記嘅話，表現都唔會太失禮。
曾經踢過阿仙奴嘅奧地利龍門曼寧加，自從離開兵工廠後一直坎坷，過去三年效力過四間球會，衰在無間踢得長。去年佢加盟博洛尼亞同老將柏魯加爭位失敗，今季，博洛尼亞明明決定將佢借去布雷西亞，但日前突然又將佢借去幾乎因假波案降班嘅錫耶納，慘成「人球」。
奧運會經已結束，阿根廷亦順利贏咗男足金牌，慶祝完後，今季加盟曼聯嘅軒斯亦應該歸隊，首次向費爵爺報到；但係佢話要踢埋世盃外圍賽先，重會由雅典直飛返阿根廷。早排有報道指軒斯冇同曼聯聯絡過，但佢話每日都有同費sir傾電話㖭，真係唔知真定假。
我求大俠前晚日就捱眼瞓睇拉科魯尼亞作客愛斯賓奴到天光，正當以為場波一比一打和，球證舉起補時牌竟然出現個「8」字，補時八分鐘，喺西甲都算非常少見；補時階段又有球員受傷，差唔多成十分鐘。投注拉科波友就開心，因為拉科有機會反勝，但最終都係開唔到齋！
阿仙奴愈贏愈有，近期無論單Ｗ、入球大、定係上盤都長捧長贏，睇佢哋走勢應該重有一段時間持續。但唔知係咪重有好多球迷未肯「接受」呢個事實，前晚嗰口孖寶半全膽，尾關阿仙奴半場贏三比○全場贏四比一都算正路，結果每十蚊注派彩都有成十一萬多，想贏大錢就咪拗頸嘞！