同樣來自澳洲嘅奧斯卡影后妮歌潔曼（NicoleKidman）同樂壇天后KylieMinogue，最近俾同鄉前輩、老牌女星嘉莉岩士唐（KerryArmstrong）狠批，話佢哋只識賣弄，實力欠奉，唔止拉低澳洲藝人水平，直情毀咗澳洲嘅娛樂事業㖭！
現年四十六歲嘅嘉莉活躍於澳洲影視圈，佢三年前憑《一切從猜疑開始》同電視劇《SeaChange》，同時捧走兩個澳洲電影協會最佳女主角獎。最近佢接受訪問時好勞氣咁話：「除咗妮歌潔曼同KylieMinogue之外，都冇乜邊個可以將澳洲娛樂圈傷害得咁厲害。」
憤憤不平嘅嘉莉重話：「Kylie根本唔識唱歌，都唔知點解佢可以成為國家嘅象徵人物。好似梅麗史翠普（MerylStreep）呢啲咁有演技嘅女演員，要喺《此時．此刻》入面企埋妮歌側邊，我覺得好難接受囉！」
另外，嘉莉又指奧斯卡係罪魁禍首：「奧斯卡屆屆都只係選埋啲好似姬妮芙柏露（GwynethPaltrow）、茱莉亞羅拔絲（JuliaRoberts）、妮歌同荷爾芭莉（HalleBerry）呢啲所謂嘅女演員做影后。」而嘉莉就好欣賞演出過《傳奇女王伊莉莎伯》同《魔戒》系列嘅卡塔布蘭切（CateBlanchett），佢認為戲路廣闊嘅卡塔，係澳洲新一代演員嘅學習榜樣。