華人置業（127）下星期一（9月6日）公布04年度中期（6月止），提早一個禮拜買定貨。
華置係銅鑼灣地主，所持有收租物業包括皇室堡、銅鑼灣地帶，至於商廈，好似美國萬通大廈、夏愨大廈、東英大廈，唔使多講，全部靚嘢。今年受惠自由行，零售市道強勢，華置收租物業，應該有好表現。
03年度，華置就投資物業重估升值，兼錄得25.9億元盈餘，所以，04年度再有咁大額資產增值，機會未必咁大。但以華置現價相對每股資產值6.64元，講緊重有近3成折讓。睇番市內好多地產收租股，好似恒隆（010）、信置（083）及會德豐（020），股價升到資產折讓得番一兩成，純粹追落後，華置有條件。莫忘記，以上每股資產值，兼且重未計算公司回購，及集團物業發展項目重未發力，呢啲可令每股資產增值潛在利好因素。
下星期一，華置又派成績表，有藉口入市，華置只係追到上資產值折讓20%，股價5.3元，呢期所見，華置又營造咗個小型上升旗形，突破4.9元位，目標話咁快就到。
漢國置業（160）上星期唔覺唔覺推高5仙。只講兩點，漢國04年度（3月止）末期派息6仙，星期三將係漢國除息日，呢次派息尚算吸引，可以喺除息日前買定等收息。第二，漢國7月至今兜個小圓底，上周三破圓底頸線1.5元，周五後抽，回試頸線1.51元位，依據圓底量度升幅，可達1.7元至1.75元，照咁睇，更加可以財息兩賺。
錢雋