女人七嘴八舌論盡近期頭條的風流男人，議題是，假如只能揀一個做伴，選北上尋歡，抑或本地開房偷情那個。「還是本地好，起碼刺激消費，對本土經濟復甦有利。」從事Marketing的靚女說。
「北上是另類的希望工程，讓內地貧家女兒有富起來的機會。內地嫖妓，是愛國的深度表現，男人選擇北上，證明心地好，愛國心爆棚。這種男人，壞不到哪裏去。」失戀了N次正打算到上海招婚的女強人說。
「玩cybersex才夠過癮。下下打真軍咁老土。兩個都揀唔落手。」IT才女拒絕落疊，寧願搵一條老狗做伴也不要男人。
「九龍塘時鐘酒店兩粒鐘才二百元，比東莞的旅館平一大截。男人鬥cheap已成大趨勢，本地那位精明過到超市格價的師奶，嫁這種男人最穩陣，肯定唔捨得豪賭，唔會輸身家，唔怕破產。」在九龍塘名校幼稚園任教的靚Miss論盡心水選擇。
「北上風險太大，萬一又試被公安逮住，我要出面指天發誓百份百相信他。件事通晒天，家醜外揚，成為滾熱辣的talkingpoint，幾冇face屎哩。制唔過。」大家閨秀乖乖女，最忌冇面子。
「九龍塘咁近，踢唔踢竇好呢？眼不見為淨，隔了一道羅湖橋比較distant，當乜事冇發生過，partnership要睇得阿Q些。」曾經滄海心已化石的女人有感而發。開房比拼，三比二，九龍塘險勝。