車之涼品：
新到頭盔通氣又潮氣
近年興起一股電單車熱，男男女女個個都話要騎隻「綿羊」出街先夠型，所以連帶頭盔都進入熱賣階段。但話時話，日日攝氏三十幾度重要戴住個頭盔都咪話唔熱，是以推介呢個「大頭佛」有通風槽、散熱口嘅設計，又或者內綿具吸汗、透氣、除臭、殺菌功能，鐵騎男女要留意喇！
記者：黃婉冰
攝影：陳陶鈞
ImageGirl：Kendy
最通氣「大頭佛」
蝴蝶花女仔至啱$765（a）
日本SmallJohnJet新返呢款蝴蝶花綿羊頭盔，搶眼黃色襯上黑色蝴蝶花，簡約又夠搶，最啱買個送畀女朋友。
Handsfree×電話夾×頭盔$1,580（a）
呢個係其中最新返嘅意大利Airoh頭盔，頂部、後方都設有可開關式透氣孔，透氣孔一啪即開，加上開面式設計，入風位較多。另配備內置Handsfree及電話夾，將電話夾在頭盔後面就可安心一邊揸車一邊「煲粥」。
■電話夾在頭盔後，再駁線就可用內置Handsfree。
■收音咪就在頭盔左側，收得清清楚楚。
可拆內綿
11個通風槽最爽約$2,600（a）
日本品牌OGK，勝在夠多透氣孔，全新設計通風槽，頂部8個，前面3大個，夠晒通風，內綿可拆出清洗，汗如雨下都唔怕。全個以玻璃纖維、碳纖維製成，設計輕磅又夠硬淨，另配備UV防紫外光鏡片、原裝頭盔袋。
■前額位有三個特大通風槽，夠晒通氣。
日本限量版有買趁手
「絕色」磨砂橙$1,480（a）
Airoh最新「磨砂橙」開揭式大頭彿，街外甚少見，下巴、頭頂有入風口同散熱位外，兩側亦設有導風式入風口，透氣度更高，內綿為排汗通爽纖維CooLMax質料，幾大汗都無有怕。
罕有全拆式內綿Bob頭盔$599（a）
要DayDay戴住個頭盔，買個可拆內綿嘅最好，日本OGK04新推Bob頭盔，係少有可全拆內綿清洗嘅綿羊頭盔，內綿同時加有備長碳同抗菌防臭功能，日日戴都唔怕會「臭崩崩」。
雙鏡式日夜都啱$1,899（a）
意大利CABERG呢款雙鏡式頭盔，除透明開揭式面罩外，內裏加有活動式茶色太陽鏡，日間可作太陽鏡，唔用可向上推收起，方便快捷，唔使成日換鏡咁麻煩。
Buco哈哈笑70掇復刻之作$1,700（b）
專玩量產同復刻出名嘅Buco，每款都充滿懷舊味，黃色哈哈笑夠經典外，頭盔Cutting都依足舊款嚟做，睇真啲邊位有少少起角，同家陣時款嘅完全唔同。
BumBleBee×Take5$990（b）（量產60個）
日本頭盔品牌BumBleBee同本地潮店Take5玩Crossover之傑作，量產60個，頭盔後面有BumBleBee個嘜頭之外，重印有Take5個Logo，極具收藏價值。
SHM美國旗80掇經典款$1,400（b）
SHM呢款80年代美國Style，家陣難得有復刻，襯舊款綿羊或者美式Chopper，掂。
同場加映!!!
電單車孖寶：眼罩+面罩
香港空氣質素每下愈況，戴住個開面頭盔，食塵都食飽，呢個時候你需要一個眼罩或者面罩，就算飛沙走石都唔怕影響駕駛，有見及此，今日同場推介幾款，買番個安全啲！
BumBleBee銀粉底超閃$1,470（b）
想九丈遠都睇得見你個頭？呢個閃到九彩嘅銀粉頭盔就啱晒，銀粉底最講求噴油手工，手勢唔好會一撻撻，咁花工夫，難怪只限做150個。
SHM手工精細又矜貴$2,000（b）
SHM最出名係以人手穿線，唔好睇呢款簡簡單單，頭盔邊包皮部份全由人手一針一針穿縫，手工非常工整仔細，好矜貴㗎。
Buco金魚缸風鏡$350（b）
金魚缸形風鏡遮得夠「全面」，可套於大部份開面頭盔，顏色深淺度根據普通人肉眼所能接受程度去做，可擋太陽光之餘又唔會過於陰暗而影響視線，有橙、藍、黑三色任揀。
眼鏡形風鏡淨色$199（a）
要求輕便或純粹當太陽鏡，可以考慮呢款眼鏡形風鏡，有防UV作用，怕金魚缸形過於侷促，呢款會較適合，除淨色外，另有水銀色（$300）供選擇。
英國HALLYON不碎眼罩$300（b）
來自英國嘅HALLYON，所用不碎鏡片已通過測試，保證夠硬淨，戴住高速飛馳完全唔使怕有石仔打眼。
有色眼罩$90（b）
嫌飛機師眼罩過於誇張，可以揀這些有色「輕」「型」款式，100%防UV，設計有似潛水鏡款式的較摩登，而且重有多色選擇。
認住標籤買頭盔
市面上頭盔款式五花八門，但要知道，有陣時樣靚但唔代表安全，基本上合法頭盔可分為「開面」式（即綿羊仔專用）、「全面」式（俗稱大頭佛）同「越野車頭盔」，而只得半個而又會露耳嘅半盔（俗稱「西瓜皮」），則不符合本港法例標準。
至於揀頭盔，當然要揀選合乎規格的，就日本入口頭盔嚟講，就必須要揀貼有PSC、SG（見小圖）貼紙之款式，此乃舊日本普通道路規格，即證明該品牌嘅頭盔製造商已通過日本「消費者生活用製品」同SG（製品安全協會）標準。據行內人士稱，政府可能在不久將來，會立例要求頭盔必須同時合乎新日本普通道路規格——JIST8133:2000規格，在意外發生時車主才能獲得合理賠償。
（a） 店名：張記有限公司
電話：23826684
地址：九龍城沙浦道40?2號地下
（b） 店名：Take5
電話：23755731
地址：尖沙嘴加連威老道41A號興明大廈1樓B&C室